تفاصيل إنقاذ مسنة بعد تواجدها 12 ساعة تحت أنقاض عقار أسيوط المنهار بسبب مكالمة هاتفية

كتب- محمد أبوالمجد:

كشفت الحاجة آمال، تفاصيل نجاتها من تحت أنقاض عقار أسيوط المنهار بعد أكثر من 10 ساعات تحت الأنقاض بسبب مكالمة هاتفية، قائلة: "إنها مازلت تتواجد حاليًا في المستشفى لتلقي العلاج بعد خروجها من تحت أنقاض المنزل المنهار"، موجهة الشكر للأطباء ومدير المستشفى على مجهودهم الذي بذلوه معها، قائلة: "عملوا معايا مجهود فوق الوصف وأنا أحسن دلوقتي الحمدلله".

وقالت "آمال" في مداخلة هاتفية لبرنامج "يحدث في مصر" على فضائية "إم بي سي مصر" اليوم الثلاثاء: "صاحب البرج بعت رسالة لأخويا قاله أخلوا البيت لأنه آيل للسقوط، وأخويا قالي غيري هدومك عشان هنمشي وبلغنا أخواتنا بسرعة عشان هنمشي، وطلبت من ابن أخويا يجي بالعربية ياخدني ولسه هغير هدومي، لقيت السقف نزل عليا"، موضحة: "التليفون كان لسه معايا ومسبتوش من ايدي، وبصيت لقيت الكراسي والترابيزة والمروحة بتاعت السقف كانت فوق راسي على طول، وحسيت إني قاعدة في خيمة، بس أنا كنت راضية بكل شيء".

وأضافت: "فضلت تحت الأنقاض حوالي 12 ساعة، وكان في تواصل دائم معايا على تليفوني، والحمدلله تليفوني فضل شغال ومفصلش"، موضحة: "أنا عايزة تعويض من المهندس محمد سعد على البيت المنهار، صاحب البيت بنى 15 دور وقالوا له دا غلط، وأنا ساكنة في بيت اللي جنب البرج وبيتي هو اللي انهار، وفي لجنة هندسية جت وقالت البرج بيطوح وأخلوا الشارع كله، ولكن البرج أثر على البيت اللي أنا فيه وأثر على بيت عمي الموجود في ضهر البرج".