"معمولي عمل وكان هيقطع عيشي".. لماذا قتل سائق اللودر مهندس التجمع؟

القاهرة - مصراوي:

حصل "مصراوي" على نص التحقيقات في واقعة مقتل المهندس فادي بعد أن دهسه سائق لودر في موقع أعمال إنشائية بمنطقة التجمع الخامس.

تلخصت أقوال المتهم أنه انتقم من المهندس ودهسه باللودر بعدما شك في طرده من العمل عن طريقه.

وقال المتهم في أقواله أمام النيابة: "أنا كنت شغال باللودر في الموقع ولاقيت ممدوح - مسؤول عن العمل- والمهندس فادي قاعدين قدام العمارة اللي شغال فيها المهندس فادي، وحسيت إنهم بيبصولي وإن المهندس فادي بيتكلم عليا وعايز يمشيني فاستنيت الأستاذ ممدوح يمشي من المكان".

وأضاف: "أول ما لقيت المهندس فادي ماشي قدام العمارة اللي جنب العمارة، اللي شغال فيها لوحده، رحت له باللودر، وخبطته بسقف سكينة اللودر في صدره من ناحية اليمين فوقع على ضهره، وبعد كده عدلت سكينت اللودر ورفعتها لفوق وخليت السكينة مقلوبة، ونزلت عليه بشفرة السكينة وهي مقلوبة في صدره ورفعتها ونزلت بيها تانی، وبعد كده لقيت واحد بيجرى عليا وبيزعق".

وأكمل: "نزل من راسه دم كثير ومن ودانه، فتأكدت أنه مات، الناس نزلتني ودخلوني جوه العمارة لحد ما الأمن جه واستجوبني، وقالي خبطته؟ قولتله اه خبطته قالي عن قصد قولتله أه، ولما سألنى ليه قولتله أنا حسيت إن هو عايز يمشينى من الموقع أو يموتني فأنا قولت أموته ودي موتة بموتة".

وذكر المتهم أنه يعاني من الأعمال السفلية منذ طفولته ولم يتخلص منها إلى الآن، وحينما وصل إلى موقع الإنشاء وجد المهندس فادي وتجنبه بعد علمه أنه يقوم بأعمال سفليه - وفق قوله في التحقيقات-.

ولا يزال المتهم قيد التحقيقات مُنذ وقوع الجريمة 17 مايو الماضي.