غلاء الأسعار يصيب مشروبات وعصائر رمضان

كتبت- إيمان منصور:

شهدت أسعار المشروبات والعصائر، التي اعتادها المصريون على موائد الإفطار في شهر رمضان، ارتفاعا كبيرا، هذا العام، متأثرة بحالة الغلاء التي أصابت أغلب السلع والخدمات في مصر بعد تعويم الجنيه.

وخلال جولة لمصراوي على بعض محلات بيع المشروبات، قال البائع إن "سعر زجاجة العصير زاد الضعف عن السنة الماضية، حتى العرق سوس اللي كان أرخص مشروب وكان الاقبال عليه بسيط غلي هو كمان".

وبلغ متوسط سعر زجاجة العرق سوس -واحد لتر- نحو 10 جنيهات، والسوبيا 20 جنيها، والتمر هندي 15 جنيها، والبرتقال 25 جنيها، وتختلف هذه الأسعار من مكان لآخر.

وقال إبراهيم شاب ثلاثيني أثناء شراء المشروبات قبل الإفطار، إن "المشروبات دي كانت تعتبر ببلاش قبل كده، دلوقتي عشان نشترييها بندفع 10 جنيهات على الأقل".

"كيس العرق سوس اللي كان بجنيه واحد دلوقتي مش أقل من 5 جنيها، بس هنعمل أيه المشروبات دي أهم حاجة قبل الفطار"، يقول علي زبون في أحد محال العصائر.