بالفيديو.. كيف تصنع صديري للوقاية من الخرطوش؟
القاهرة- مصراوي:
نشرت حملة ''مُصرِّين'' على موقع ''يوتيوب'' فيديو لطريقة صنع صديري للوقاية من الإصابة بطلقات الخرطوش التي تستخدمها قوات الأمن لفض التجمعات والمظاهرات.
وجاء في الفيديو: ''تنبيه هام.. الواقي ده يقدر يقلل من شدة الإصابة بالخرطوش ولكنه لايعطي حماية كاملة خاصة إذا كان الضرب من مسافة قريبة، بعد عدة تجارب عملناها لقينا إنه يقدر يحميك من ضرب الخرطوش إذا كانت المسافة بينك وبين العدو لا تقل عن ٨ متر، كل ما كنت أبعد كل ما كان الصديري فعال وكل ما قربت من مصدر الضرب كل ما فعاليته قلت وده هيعرضك لخطر إصابة شديدة وممكن تكون مميتة''.
''لعمل الصديري هتحتاج كانز حاجة ساقعة ، كل ما كان أكتر كل ما كان أحسن، ممكن تطلبوا من اصحابكم ميرموش الكانز ويجمعوهالكم وممكن تتفقوا مع أي مطعم في الحي إنه يديكم الكانزات الفاضية وممكن تشتروها بالكيلو من بياعين خردة الألمونيوم والكيلو بيتباع بـ ١٠ جنيه''.
''هتحتاج: قصافة، فتاحة علب، مقص قوي، صمغ المعادن ، حتة قمااش ، زرجينة كبس، شريط لاصق اسمه داكت تيب وده متوفر في السوق عند محلات مستلزمات التكيفات زي شارع نجيب الريحاني في وسط البلد''.
''أول حاجة هنعملها هنقص القماشة على قد المساحة اللي عايزين نغطيها، هنشيل الغطا بتاع الكانز، ممكن تعمل ده بالقصافة بس إحنا لقينا إن الفتاحة لو استخدمتها بالمقلوب أسهل كتير عشان هتقدر تخلع الغطا كله''.
الخطوة الثانية ''هي قص الكانز بالطول وقص القعر كمان عشان يكون عندنا شرايح الومنيوم نشتغل بيها بعد كدة هنحتاج برضه نقص الجزء المنحني عشان نقدر نفردها بعد كدة، نحاول برضه نقص الأطراف المشرشرة، قعر الكانز هنقص الزيادات اللي فيه ، وهنقص كل شريح نصين''.
''دلوقتي هنرص الشرايح فوق بعض كل ما زودتم عدد طبقات الشرايح كل ما كان أفضل بكتير، ننصح آنك تستخدموا ٦ طبقات على الأقل.. دلوقتي هنخلط صمغ المعادن ونبدأ نلزق الطبقات في بعض لازم تشتغلوا بسرعة لأن الصمغ بينشف بسرعة جداً''.
''هناخد كل مجموعة شرايح ونلزقها في بعض.. حاولوا تكتروا من الصغ بقدر الامكان لأن الصمغ نفسه لما بينشف بيتحول لمادة صلبة بتدي حماية أكبر.. ركزوا على أطراف الشرايح عشان دي بتكون أضعف منطقة.. بعد ما تلزقوا كل مجموعة شرايح في بعض لازم تتكبس لحد ما تنشف، احنا استخدمنا الزرجينة لكن لو مش متوفرة ممكن تحطوا الشرايح تحت كتب كبيرة أو أي حاجة تقيلة''.
بعد ١٠ دقايق هيكون الصمغ نشف وتقدروا تفكوا الزرجينة، وبعد ما الطبقات تلزق كويس في بعض وبقت اكثر صلابة، دلوقتي هنرص الشرايح تاني على القماشة، وهنحط فوق كل مجموعة قعر''.
''ملحوظة القعر بتاع الكانز أكثر صلابة من الشرايح بكتير، كل ما كترتم منها كل ما اتوفرت حماية أكبر.. أهم حاجة تاخدوا بالكم ان يكون في فواصل عشان تقدر تتحرك بمرونة وانت لابسه.. دلوقتي هنثبت القعور فوق الشرايح بالداكت تيب.. بعد كدة هنثبت الشرايح فوق القماشة.. وهنبتدي نلف الداكت تيب على المستطيل بتاعنا عشان نثبت كل حاجة في مكانها.. كل ما لفيت الداكت تيب عدد مرات اكتر كل ما كان أفضل لأنه هيعمل طبقة حماية إضافية''.
''دلوقتي بقى عندنا درع واقي.. هنثبته على تي شيرت او فانلة عشان تقدر تلبسها تحت هدومك.. تنفذوا الصديري تأمنوا الصدر والضهر والجناب''.
''الواقي ده هيقلل من إصابتك لو اتضربت من على بعد ٨ متر فأكتر، ولكنه مش هيوفر لك حماية كاملة وكل ما قربت من مصدر الضرب كل ما قلت كفاءة الواقي.. وما تنسوش تحموا عنيكم ورأسكم ورقبتكم''.
فيديو قد يعجبك:
