عمرو مصطفى لسلمى صباحي :''بابا بيشتغل ايه''.. وسلمى ترد :''ليه بتجر شكلي''

كتبت - سحر عزام:

عبرت الإعلامية سلمى صباحي عن إعجابها بأغنية ''بشرة خير'' للمطرب حسين الجسمي والتي كتبها أيمن بهجت قمر ولحنها عمرو مصطفى، مشيرة إلى أن هجوم وحديث عمرو مصطفى عن والدها ينم عن جهل منه - حسب قولها.

حيث كتب الملحن عمرو مصطفى عبر صفحته على ''فيس بوك'' معلقا على إشادة سلمى صباحي بأغنية بشرة خير، قائلا :''عزيزتي سلمى انتي عارفة اني محبش بابا ومش عارف هو بيشتغل ايه وأغنية بشرة خير لحنى على فكرة وطبعا لحني تبقى تحيا مصر فاهمة ولا الفهم بطئ زي بابا''.

وقالت سلمى عبر صفحتها على موقع التواصل الاجتماعي ''فيس بوك'' اليوم السبت :''مش عزيزي عمرو مصطفى .. معلش مقدرش اقول عزيزي لحد مش عزيز عليا فعلا! ليه بتجر شكلي!! دانا لسه بشكر في الغنوة!!، أنا عارفة إن الغنوة لحنك وعارفة انك مؤيد للسيسي وعارفة انك مبتحبش حمدين وواثقه انك مابتحبوش ''عن جهل'' زي بالظبط مانت مش عارف بيشتغل ايه ''عن جهل'' وزي مابتقول وبتردد كلام كتير جدا ''عن جهل'' برضو .. بس ده مالوش أي علاقة بإن الغنوة فعلا عجبتني:) الفن بالنسبالي أنقى وأرقى من التوجهات والاختلافات والغنوة كلام قبل ماتكون لحن ومنكرش إن اللحن اللذيذ اللي شبه كل ألحانك المنحوته عجبني برضو''.

وتابعت :''أنت معروف عنك من أيام الجامعه أصلا إنك ''نحيت'' شاطر بصراحة .. دي حاجه معروفة في الوسط كله مش أنا اللي اكتشفتها حتى اسأل اي حد!!، بص أنا عارفة إن قلبك طيب جدا لما شفتك صدفة في صدى البلد بعد ثورة يناير بكام شهر وجيت سلمت عليا واعتذرتلي عشان كنت كاتب عني على صفحتك دي برضو اني منفعش مذيعه لاني ''تخينه وفشله'' اد ايه ساعتها عرفت انك سطحي لدرجه مرعبه والمصيبه انك وقتها قلت كده بس عشان مبتحبش حمدين مش عشان شوفتني فعلا لا اصلح كمذيعة''.

واستطردت :''في كل الأحوال أنا شايفه إن الانتخابات مش مفروض تخسر الناس بعض، أكيد مبتكلمش عني انا وانت لأننا اصلا مش أصحاب، لكن عموما متحاولش تخسر حد بكلام مالوش معنى ،أننا ليا اصدقاء بحترمهم جدا منهم ايمن بهجت قمر هو مؤيد للسيسي لكن عمر ده ما خلانا نجرح في بعض ولا نهين بعض لأن انا مؤمنة إن كل واحد حر في اختياره طالما عارف هو بيختاره ليه''.

وأكدت الإعلامية سلمى صباحي، أن ''شعار تحيا مصر الخاص بحملة عبدالفتاح السيسي لا يغيظها كما يؤكد عمرو مصطفى وأن مصر تحيا بناسها وليس برئيسها''، مضيفة ''بالنسبه بقى للبطء في الفهم انا مش هارد على الجمله دي وبدعيلك ربنا يشيل الغشاوه من على عيونك وقلبك وضميرك عشان تعرف تشوف الحقيقه صح ..وفي الاخر ربنا يولي الأصلح عشان أهم حاجه مصلحة بلدنا''.

لمتابعة أهم وأحدث الأخبار اشترك الآن في خدمة مصراوي للرسائل القصيرة.. للاشتراك...اضغط هنا