بعد تعويمه.. "الجنيه يجيب إيه النهاردة؟" - (فيديو)

تقرير - نورا ممدوح :

تصوير - علاء أحمد :

بعد قرار البنك المركزي المصري بتخفيض قيمة الجنيه بنسبة 48% ليسجل الدولار 13 جنيهًا في السوق الرسمية بالبنوك مع السماح بتحركه في هامش بنسبة 10 في المئة ارتفاعًا وانخفاضًا، رصد "مصراوي" آراء المواطنين في الشارع بسؤالهم "الجنيه يجيب أيه؟!".

"ميجيبش حاجة" اكتفى بها سائق الميكروباص ردًا على السؤال، مضيفا "بحتاج في اليوم مش أقل من خمسين جنيه علشان أصرف على بيتي وعيالي ويادوب أجيب بيهم شوية خضار وكام رغيف عيش".

وفي الصيدلية، يقول الطبيب الصيدلي، "الجنيه ميجبش عندي غير سرنجة مش أكتر من كدة"، أما خارج الصيدلية يضيف "ولا بيجيب حاجة وبحتاج في اليوم مش أقل من 30 جنيه لوحدي".

"هي شقة الفول بكام النهاردة ؟" كان ذلك رد أحد المواطنين في الشارع عند سؤاله عن الجنيه،" متابعًا: "سندوتش الفول بقى بـ1.5 دلوقتي، يادوب الجنيه يجيب باكو لبان، مرتبي 1300 جنيه وميكفنيش مش أقل من 70 جنيهًا في اليوم علشان أعرف أعيش صح".

أما بائع العيش، يقول: "الجنيه يجيب من عندي رغيفين عيش بس، ومعرفش أحدد محتاج كام في اليوم علشان أعيش لأن كل حاجة بتزيد كل يوم ومش ثابتة".

وتقول ربة منزل، "الجنيه مش هيجيب حاجة لو عطيته لحفيدي وقولتله هات بيه باكو بسكوت مش هيكفي وعلشان أكلف آكلة مش أقل من 150 جنيه يومياً والعشا مش أقل من 30 جنيه حتة جبنة وعيش".

وتأتي قرارات البنك المركزي في سياق البرنامج الأوسع للإصلاح المالي والهيكلي الذي أعلنته الحكومة المصرية، وجار تنفيذه بإحكام لتخفيض عجز الموازنة والدين العام من خلال استكمال إصلاح منظومة الدعم وترشيد الإنفاق الحكومي، وخفض الواردات خاصة الاستيراد العشوائي، وزيادة الصادرات - بحسب بيان رسمي للبنك المركزي.​