حجاجوفيتش يوضح أسباب حصول مصر على المركز الاخير في سرعة الانترنت

كتبت-عبير القاضي:

أوضح الرحالة المصري، أحمد حجاجوفيتش، أسباب حصول مصر على المركز الأخير في سرعة وجودة الانترنت، قائلا :" الناس في العالم بيتكلموا في سرعات 300 ميجا وانت طالع، واحنا لسه بنتكلم في 2 ميجا".

وقال حجاجوفتيش، عبر حسابه الشخصي على موقع التواصل الاجتماعي "فيسبوك" أمس الثلاثاء، "الناس بتسأل ليه مصر أخدت المركز الأخير في سرعة و جودة الإنترنت ما بين كل دول العالم، ببساطة شديدة لإن الانترنت في مصر يعتبر أسوأ و كمان أغلي خدمة انترنت في العالم كله بالنسبة للسرعة المقدمة، و بالإضافة إلي خدمة عملاء و عروض قمة في السوء".

وأضاف قائلا :" الناس في اوروبا و امريكا و الدول المتقدمة بطلوا خلاص يتكلموا في سرعة ميجا او ٢ او حتي ١٠ ميجا بقوا يتكلموا في سرعات ٥٠، ٢٠٠،١٠٠ ،٣٠٠ ميجا و انت طالع فوق، و الحكومات و شركات الانترنت بتهتم في الخارج بإنها توفر اعلي التكنولوجيا اللي بتخلي السرعات انها تبقي مهولة هناك، الإنترنت خلاص بقي مسيطر علي العالم كله دلوقتي و لو حصل اي عطل فيه في اي بلد، البلد ديه بتخسر مليارات الدولارات في ثانيتها .. يعني مفيش اقتصاد قوي محترم حيطلع من انترنت بطئ، و شركات الانترنت في مصر بتهتم فقط بسرعة التحميل و بتلاقي انك لو عاوز ترفع صورة بتاخد منك وقت كبير لان سرعة الرفع بتكون اقل من التحميل بكتيرعكس معظم دول العالم اللي بتهتم بالإتنين".

وتابع :" أن معظم دول العالم بقي عندها انترنت ال 4G علي الموبايل و خلاص حيصدروا قريب ال 5G (اللي حيخلي سرعات النت ١٠٠ ضعف سرعات ال 4G الحالية) و احنا بنحمد ربنا لو لقطنا ال 3G اللي صدر سنة ١٩٩٨، و معظم دول العالم بقت كل خطوطها فايبر و احنا لسة بنستخدم سلوك متهالكة متكعبلة كلها في بعض، و معظم دول العالم لغت سياسة الاستخدام العادل او حتي لو بيطبقوها بتكون مساحة الدانلود كبيرة جداً و غالبية الناس مش بتخلصها بالرغم من التحميل الكبير بسبب السرعة العالية، الانترنت قدر يوصل ل ٥٠ مليون شخص في ٤ سنين فقط في حين ان التليفيزيون وصل للعدد نفسه في ١٣ سنه و الراديو وصل برضه للعدد نفسه في ٣٨ سنه!، حوالي ٢٥ بليون ايميل ( ٢٥٠٠٠ مليون) بيتبعت يومياً بيقوم عليهم صفقات بمئات المليارات .. ده غير ان في الثانية الواحدة بس في الفيسبوك بيتكتب ٨٥٠٠ كومنت و بيتكتب ٥٤ الف منشور جديد و بيترفع ٣١ ألف صورة جديدة و في الثانية الواحدة بس علي الانستجرام بتترفع ١١٥٨ صورة و في الثانية الواحدة بس بيحصل ١٤٣٨ مكالمة سكايب جديدة اللي شركات المحمول قافلاه عندنا بدون اي اسباب مقنعة.. و في الثانية الواحدة بس بيتم مشاهدة ٨٥,٥٠٠ فيديو علي اليوتيوب و في الثانية الواحدة بس بيتبعت ٢,٣١٧,٣٤٢ إيميل جديد".

واختتم حجاجوفيتش، كلامه قائلا :" مفيش دولة في العالم كله بتكلم خدمة عملائها عشان عندك مشكلة في الانترنت كل اللي يقولوهولك انك تقفل الرواتر و تفتحه، يا تري لسة في ناس بتسأل ليه مصر اخدت التصنيف ده، و هل تتوقع ان في مصر قريب يبقي سرعة الانترنت عالية و رخيصة زي باقي الدول".