إذاعية تُجبر على ترك راديو هيتس.. وتؤكد: "الظلم نهايته صعبة قوى"

كتب- أحمد لطفي:

رفضت الإذاعية الشابة، زهرة رامي، مقدمة برنامج "أبدا يومك" الحديث مع الإعلام حول أسباب إقالتها من راديو هيتس ونقلها بشكل جبري لاذاعة ميجا التابعة لراديو النيل.

ولكنها اكتفت بالكتابة عبر حسابها الرسمي فيسبوك، اليوم الثلاثاء، قائلة "راديو هيتس مش مجرد مكان بشتغل فيها أو محطه باطلع هوا فيها .. ده كيان بنيته حرفيا ! ٦ سنين باغزل برجل فرخه ! بنحت فى جبل! السلوجن بتاعها متقال بصوتى ! طلعت بأول برنامج فيه .. و كنت مش بعمل حاجه غير انى أحاول بصدق و احترام أنجح فى وسط صعب ! كنت محظوظه بالهيتساويه اللى معايا .. ولاد أصل .. نجاحى الشخصى جه بدعمهم و حبهم !".

وتابعت: "و الحمد الله أصبح من أهم البرامج الصباحيه ! حاولت أبقى قد المسؤليه ! حاولت أخد بالى أكتر من كلامى و من المحتوى و خاصة لما بقيت مأثره فى الأطفال بشكل مباشر .. عملت أول برنامج ليهم و كنت بحلم تبقى فتحة خير و الاعلام يبتدى يركز مع الأطفال أمل بكره ! و حصل ! كل هدفى ازاى كنت ابسط الناس و اهديهم و اخليهم يسمعوا بعض ! و الحمد الله ماليش قاعده جماهريه بفئه عمريه أو فكريه معينه !".

وأردفت: "حاربنا و تعبنا كتير قوى و فعلا اللى قريبين منى عارفين انى ديما بقول انها بنتى ! أنا اتبلغت ان برنامجى هيقدمه حد تانى، اتبلغت ان برنامج الأطفال هيكون مع حد تانى و اتبلغت انى جبرا اتنقلت اذاعه شقيقه تانيه، قرار أو أمر .. أسباب مش واضحه ولا معلومه ! أنا مش زعلانه عشان عارفه ان الظلم نهايته صعبه قوىىىىىى

أنا صعبان عليا بنتى و أصحابها بس".