السيسي للمصريين: "عايزين تعليم حقيقي ولا عايزين ولادكم يبقى معاهم شهادات"

القاهرة - مصراوي:

وقال الرئيس عبدالفتاح السيسي -في مداخلة خلال جلسة "استراتيجية بناء الإنسان المصري" بمؤتمر الشباب الوطني السادس بجامعة القاهرة اليوم السبت- "أنا هتكلم عن التعليم، انتوا عايزين تعليم حقيقي ولا عايزين ولادكم يبقى معاهم شهادات، لو عايزين تعليم حقيقي دي رحلة طويلة وقاسية وفيها معاناة للأسرة والطالب والجامعة والمدرس، أنتم عايزين تغيرو بلدكم؟ طيب مستعدين تدفعوا الثمن ودا سؤال بطرحه لكم وأنا بتكلم على شق واحد للتعليم".

وأضاف السيسي"لما نيجي نتكلم على الخطاب الديني، أنتم خايفين نضيع الدين، واللي احنا فيه دا.. هل هناك أكثر منه ضياع للدين؟.. أريد أن أقول عندما يكون فكر أمة مبني على الحرب، والحرب استثناء، ولما يكون الفكر اللي مبني كله لأمة ما هو الحرب فقط، يعني خلال الـ200 سنة الماضية على الأقل فهمهم لدينهم على إن الحرب هي الاصل والاستثناء هو السلام"، متسائلا: "معقول في فهم ديني كدا؟.. فانتم خايفين من إصلاح الخطاب ليضيع الدين.. طيب هو أنتم اللي فيه دا في أكثر من كدا".

وتابع "الدكتور أشرف وزير الشباب كان بيتكلم عن التمييز المذهبي والإلحاد.. هو الإلحاد دا الناس اللي اتهزت نتيجة الحالة اللي إحنا فيها.. شبابنا وشاباتنا قلقوا ومصدقوش إن ممكن يكون الخالق العظيم منزل أديان تهد الدنيا، معقول! فأنتم عايزين تعملوا إصلاح لخطاب ديني ولا خايفين لنضيع الدين".

وتابع: "لوعايزين تتكلموا عن قيم أخلاقية طيب انتو مستعدين تقبلوا في التليفزيون والسينما والمسرح سلوكيات لا تليق وفي الآخر نقول هذا إبداع وحرية إبداع.. في خيط رفيع، عايزين تصلحوها ولا مش عايزين، بتقولوا القوانين والتشريعات.. طيب أنتم شايفين قضايا مجتمعية موجودة عندنا يعني مثلا هم قالوا نسب الطلاق 44% يعني كل 100 حالة زواج يحدث بها تقريبا 50% طلاق.. بيقولوا هناك 9 ملايين طفل بدون اب وأم بشكل مباشر.. طيب في كمان 15 مليون بشكل غير مباشر يعني انفصال بشكل خفي معملوش وثيقة انفصال هل تتصدوا كمجتمع.. عندما طالبت بضرورة إصدار تشريع لتوثيق الطلاق هوجمت".​