السيسي عن إصلاح الإعلام: "هنبقى في مكان أفضل خلال 3 سنوات"

كتب- محمد نصار:

قال الرئيس عبدالفتاح السيسي، ردًا على سؤال حول إصلاح الإعلام، إن قطاع الإعلام شأنه شأن كل قطاعات الدولة المصرية.

وأضاف: "إيه اللي حصل؟، اللي حصل إن الأمور توقفت على مدى سنوات طويلة على أوضاع ثابتة ولم تتطور ومنها الإعلام بقى غير متطور وتأثيراته لا تحقق الأهداف المرجوة منه، قطاع الإعلام زي كل قطاعات الدولة المصرية".

وتابع: "في مشكلة كبيرة جدًا كانت موجودة فينا كلنا، مش في قطاع واحد، في كل القطاعات، بالتالي الإصلاح واجب لكل القطاعات بما فيه قطاع الإعلام، وده مش معناه إساءة لأحد الموضوع مش أشخاص، يا ترى الإعلام عندنا هنا هل منظومته الاقتصادية جيدة بيتكلف علينا ما يقرب من 6 مليارات جنيه في السنة، واللي بيتحقق منه 2.3 مليار جنيه فقط".

وتابع الرئيس: "طيب المحتوى، يا ترى هو اللي إحنا نتمناه نقدمه، كان في يوم من سنين طويلة، كان الإعلام له تأثير كبير جدًا، وكان له عوائده، مسلسلات التليفزيون وتسويقها في الدول العربي، حصل تطور في الدول العربية وفضلنا زي ما إحنا، نتحرك في إصلاح هذه المنظومة، الشق الاقتصادي والفني، اللي كتير مننا غير راضي عنه، والمحتوى إذا ما كنش الدولة بشكل أو بآخر يكونوا بيفكروا في كده، في دول زي الولايات المتحدة والهند بيدخلها أموال هائلة من الأفلام وده شكل من أشكال تقديم الدولة للعالم".

وأكد الرئيس: "بنشجع جدًا كل الشباب، ولما نشوقف الوجوه الإعلامية الموجودة، مش هوعدكم بحاجة في الموضوع ده، بدأنا في المحتوى وأتصور خلال سنيتن أو 3 هيبقى المحتوى أفضل من الواقع ده، الإعلام تليفزيون وراديو مبقاش الوسيلة الوحيدة اللي بيتم إيصال المعلومات بيها للناس، في حاجات أخرى كثيرة جدًا، ومهتمين نبقى متحركين فيها علشان نواكب العصر اللي موجودين فيه، خلال سنتين أو 3 هنبقى في مكان أفضل كتير من المكان اللي إحنا موجودين فيه بشكل أو بآخر بالتوافق مع الصناعة الموجودة في هذا المكان".

وأشار الرئيس: "بنعمل حجم من المنشآت يمكن حد يصنفها على إنها ثقافية زي مدينة الثقافة والفنون في العاصمة اللي ممكن تخلص بالكتير على نصف العام المقبل، ونفس النسخة مصغرة منها في العلمين، ومجموعة متاحف زي المتحف الكبير ومتحف الحضارة، فيما يخص الشق الفكري والثقافي والإنساني في مصر، هتجدوا إن إحنا متحركين فيه بشكل قوي، بناخد بالأسباب التي تؤدي إلى تحقيق نقلة حقيقة".

وبدأت منذ قليل وقائع جلسة "اسأل الرئيس" ضمن فعاليات اليوم الثاني للمؤتمر الوطني للشباب في نسخته السابعة، والتي يجيب فيها الرئيس عبدالفتاح السيسي على تساؤلات الشباب التي تلقتها مبادرة "اسأل الرئيس" قبل أيام من انطلاق المؤتمر.

وبدأت منذ قليل وقائع جلسة "اسأل الرئيس" ضمن فعاليات اليوم الثاني للمؤتمر الوطني للشباب في نسخته السابعة، والتي يجيب فيها الرئيس عبدالفتاح السيسي على تساؤلات الشباب التي تلقتها مبادرة "اسأل الرئيس" قبل أيام من انطلاق المؤتمر.