هندي فرصة ومهلة.. مدبولي لوزير الصناعة: آخر حاجة ممكن نعملها إننا نغلق مصنع

كتب- محمد عمارة وأحمد السعداوي:

قال الدكتور مصطفى مدبولي، رئيس مجلس الوزراء، إن أي مشروع كبير جاي وعايز يتنفذ، حضراتكم تيجوا لي مباشرةً، فيه لجنة مشكلة، بانزل لهم طلب تخصيص أرض، وبنخصص بشكل مباشر.

وأضاف مدبولي، خلال فعاليات اليوم الثالث من مؤتمر مصر الاقتصادي مصر- 2022، اليوم الثلاثاء: خصصنا 135 قطعة، وده خلال الشهور الماضية؛ استثمارات عالمية وبراندات كبيرة، الأهم تم تكليف هيئة التنمية الصناعية إنها تطلع الرخصة بالنيابة عن كل الجهات، الأهم، وده طلع به قرار في مجلس الوزراء، إن المطور والمصنع في الشروط البيئية والصحية، بيمضي إقرار على نفسه إنه ملتزم بالمعايير، مش هيروح ياخد موافقة من أي حد.

وتابع رئيس الوزراء: بعد ما المصنع يتنفذ، هننزل ونتأكد من هذه المعايير، وأقول لوزير الصناعة: مش هيتم غلق أي مصنع، هندي فرصة ومهلة، آخر حاجة ممكن نعملها إننا نقفل مكان، بس طالما طالبنا بعمل تيسيرات يبقى لازم نلتزم.

واستطرد مدبولي: موضوع الإعفاءات الضريبية، كنا بنفكر فيها؛ لكن الممارسات العالمية بتقول لو اديت مستثمر أجنبي إعفاء ضريبي، هيروح يدفع الضريبة في بلده، يبقى أنا ما استفدتش حاجة.

وأضاف رئيس الحكومة: قدمنا مشروع قانون بحافز استثماري، يعني الدولة شايفة مصانع واستثمارات مهمة، بمجرد ما المستثمر يقدم، الدولة هترد له جزءًا كبيرًا من ضريبة الدخل في حد أقصى 45 يومًا، الدولة هتدفع فوائد إن لم تلتزم في هذه المدة.

وقال مدبولي إن قرار تسعير الأراضي تم نشره في الجريدة الرسمية، وأطالب وزير الصناعة يعيد نشره، عشان كل الناس تعرف الأسعار، عشان تبقوا مطلعين عليه.

واستكمل رئيس الحكومة: موضوع توحيد الضبطيات القضائية، مشكلتها إنها خرجت في قوانين متعاقبة، عشان مايبقاش كل يوم حد ينزل على مصنع.. معالي وزير الصناعة، حضرتك مكلف تعمل تصور للموضوع ده وتعرضه على مجلس الوزراء.

وأضاف مدبولي: بتتكلموا على موضوع الشباك الواحد، احنا رايحين على الميكنة؛ المستثمر هياخد إن شاء الله رخصة أون لاين، أي مشروع كبير سواء نقل مصانع من دول أخرى أو مستثمر خارجي، أرجو تتواصلوا معايا مباشرة.