إوعى تكره الفقير.. رسالة من السيسي لأصحاب الشركات بشأن الاستغناء عن العمالة

كتب- محمد عمارة وأحمد السعداوي:

قال الرئيس عبد الفتاح السيسي، متحدثًا إلى حضور المؤتمر الاقتصادي، إن المسار الحالي أكبر من أي أحد، مضيفا: لازم أشتغل على كل قطاعات الدولة، حد يقول لي مهتم بالحديد والأسمنت، طب والبشر؟ مهتم بكله.

وتابع السيسي، خلال الجلسة الختامية للمؤتمر الاقتصادي مصر- 2022، اليوم الثلاثاء: حد يقول لك دول بيعملوا الجامعات الأهلية عشان يدّوها للأغنياء، أنا بأعمل مسار بتكلفة أقل عشان أحسِّن التعليم، بأتخلَّص من القبح في كل شيء.

وأوضح الرئيس: عايزين نشوف زي بعض، باختلاف، قُول لي وجهة نظرك، أنا حلِّيت مشكلة الموانئ، أنا ماعنديش وقت أتأخر أكتر من كده، ماعنديش مهلة 10 سنين عشان الناس تييجي، اللي أعرف أعمله، أعمل أنا، طب بقت موجودة، اللي عايز يتفضل، لكل الناس بما فيها شركات الجيش، طب شركات الدولة مطروحة، طب مش بتعتبروا ده فرصة.

وواصل السيسي: والله أنا صادق معاكم، كل شركات الدولة معاكم، بس ماتجيش تقول لي نفض لي منها العمالة الزايدة واديهالي، طب إزاي يعني؟! لما تعمل شركة قطاع خاص بتنقي ناسك، اللي حصل ده ميراث، إوعى تخلي غضبك من سوء الأداء يتحول لعداء مع اللي بيعمل سوء الأداء، إوعى تكره الفقير.​