"أنا بحلف بالله".. رسائل مهمة من السيسي للمستثمرين والحكومة

كتب- يوسف عفيفي:

وجه الرئيس عبد الفتاح السيسي، رسالة إلى المستثمرين الراغبين في العمل داخل مصر، خلال افتتاح الملتقى والمعرض الأول للصناعة الذي ينظمه اتحاد الصناعات المصرية بمناسبة مرور 100 عام على إنشائه.

وقال السيسي، خلال كلمته في افتتاح الملتقى الأول للصناعة: بأقولكم كلكم يا اللي هتشتغل، ابدأ وأنا مستعد أدخل معاك بالنص، عشان أشجعك تبقى مطمن إن جزء من المخاطرة الدولة معاك فيه، والله أنا بحلف بالله، ما فيه هدف غير أن أشجعك، هدخل بـ 30% أو 50%، أكتر من كده أنت حر، بس أنت لازم تدير شغلك.

وأضاف: شوف أنا بقول لكل المصريين، موضوع أزمة الدولار كاشفة، فاتورة الدولار بتزيد سنة بعد سنة، إذا ماكناش نسابق الوقت إننا ننتج، ونحقق وجزء منه نحقق فرصة لينا ونوفر مستلزمات ومنتجات بنجيبها من الخارج، منها ازود الناتج المحلي، وأشغل عمالة وعوائد من التشغيل، أنا مش بأقولك استهدف التصدير بس، استهدف تغطي الطلب في مصر، الكلام لكل المستثمرين، اللي يهمهم مصر تكبر وتنمو، مش مش هتكبر غير أننا دايما مع بعض.

وتابع الرئيس: طب أنا مش قادر أوصلكم الحتة دي من خلال مؤسساتنا، بدليل المهندس محمد زكي السويدي، بيطلب الرخصة الذهبية، بأقول للقطاع الحكومي في مصر، ساهم معانا، وكأنك بتعمل عمل لنفسك مش للمستثمر، صدقوني قبل ما آجي هنا، فكرت أعمل المكتب ده عندي، وعندي القدرة أفطسكم، عشان تعملوا، لأن "أعمل" أقل خطورة من قول: هدرس وأشوف، الناس بتحط معايير مؤسسية للعمل، لكن ممكن تكون معيقة لتقدمنا، وحجم الضرر يكون كبير، والله قبل ما آجي، قولت أعمل المكتب عندي أنا.. ده مش معناه عشان محدش يفهمني غلط.. الناس مش بتشتغل، لو عايزين نتجاوز اللي احنا فيه، لازم إجراء غير تقليدي للعمل.

وأكمل: بقول تاني، أنت عشان البنك يوافق لازم تعمل دراسة جدوى، يا سيادة المحافظ "محافظ البنك المركزي" عشان يقدر يمول مشروعه، البنك بيطلب منه طلبات محددة، بتتكلم على المصري ولا الأجنبي، المصري هأحلها دلوقتي، طالما عندنا قوائم ان الحاجات دي طالبينها، أقدر أقول للبنك لما المشروعات دي تتعمل، من فضلك اتعامل معاها، بالطريقة بتاع دراسات الجدوى ياخدوا مني 5 سنين، بالطريقة اللي بتكلم عليها ياخدوا سنة، ممكن يبقى جواها 2 مش مضبوطين، أنا مستعد أدخل معاكم كدولة عشان نتجاوز الوقت والخوف.

وينظم الملتقى والمعرض الدولي الأول للصناعة، اتحاد الصناعات المصرية في مركز المنارة للمؤتمرات وذلك بمناسبة مرور 100 عام على تأسيس الاتحاد.

ويشمل المعرض الذي يقام تحت رعاية الرئيس السيسي، عددًا من الأجنحة الضخمة للصناعات المتنوعة، وعلى رأسها قطاع الصناعات الهندسية وصناعة الآلات والمعدات والماكينات.​