السيسي: شبكة الطوارئ والسلامة مؤمنة ويصعب إعاقة أو قطع اتصالاتها

كتب- محمد نصار:

قال الرئيس عبد الفتاح السيسي إنه سيتم استكمال المنظومة الخاصة بالشبكة الوطنية للطوارئ والسلامة العامة في جميع محافزات الجمهورية خلال 4 أشهر.

وأضاف السيسي: هنخلص الجمهورية بالكامل خلال 4 شهور، وأشكر كل من ساهم في هذا المشروع وده كان حلم حلمنا بيه من سنين طويلة فاتت والحمد لله ربنا وفقنا وخلصناه تقريبا.

وتابع الرئيس: في كل المشروعات اللي زي دي يمكن كتير مش متصورين إيه اللي ممكن المنظومة دي تقدمه للدولة، وده محتاج مننا في الإعلام نشرح أكتر ونفهم الناس أكتر.

وواصل السيسي: لما بنتكلم على تأمين بيانات واتصال بنتكلم على حاجات فنية مش بس معقدة وحجم التأمين اللي فيها قد يصل لنسب عالية جدا مش عايز أقول 100% علشان أكون دقيق، والهدف أن الاتصالات والبيانات المتداولة على هذه المنظومة يصعب إن مكنش مستحيل التدخل فيها أو إعاقتها أو قطعها.

واستطرد: كتير من الناس يقول كانت حاجة حصلت على الطريق وماحدش سمعني أو جالي إلا بعد ساعة أو ساعتين، لكن الكلام اللي بيحصل ده على مستوى المحافظات من خلال مراكز التحكم الدولة بتشوف بيه بعضها، محافظة زي الأقصر أو غيرها هيبقى فيه مركز صغير يشرف على كل الخدمات والمحافظة ستكون متصلة بالمركز المركزي آليا وبنبقى شايفين بعض ونلاحظ لو في مشكلة أو تطلب الأمر أكثر من طاقة المحافظات.

ويفتتح الرئيس عبد الفتاح السيسي، صباح اليوم، مركز التحكم المركزي للشبكة الوطنية الموحدة لخدمات الطوارئ والسلامة العامة المتطورة بالمقطم.

وأعلن السفير بسام راضي، المتحدث باسم رئاسة الجمهورية، أن مشروع الشبكة الوطنية الموحدة لخدمات الطوارئ والسلامة العامة المتطورة يعد إنجازا تاريخيا ونقلة حضارية كبرى لمصر في التعامل مع الأزمات والطوارئ من خلال منظومة واحدة تشارك فيها جميع الوزارات والهيئات ودواوين المحافظات بالدولة، بما تضمن جودة التعامل مع الأزمات الطارئة وسرعة احتوائها بمعايير عالمية.

وتدعم الشبكة جهود الدولة في مجالات التأمين المختلفة في كافة أنحاء الجمهورية باستخدام أحدث الوسائل التكنولوجية الحديثة لصالح الأمن والخدمات على مستوى الدولة.