"شقة معفنة مواصفاتها زي الزفت".. أغرب إعلان لبيع شقة في 6 أكتوبر

كتب- إسلام لطفي:

تداول روَّاد مواقع التواصل الاجتماعي، أحد أغرب الإعلانات الخاصة ببيع الوحدات السكنية، حيث استهل إعلانه بـ"عندي شقة معفنة للبيع مواصفاتها زي الزفت".

واستكمل الإعلان: "الدور السادس والأخير يعني رجليك تورم لحد ما تطلع ده غير كمان سخونة الصيف وبرد الشتاء وعدم طلوع المياه بدون ماتور.. تاني حاجة مش مالك أصيل، لا يا حبيبي أنا شاريها بتوكيل تالت حاجة مش عقد أخضر دي عليها قسط ثابت كل شهر 350 جنيه لحد ما تموت".

وأضاف: "رابع حاجة في أبناء الجيزة المرحلة التالتة يعني جنب مساكن عثمان وما أدراك من مساكن عثمان، خامس حاجة نموذج 1 يعني 6 شقق في الدول الواحد يعني كمية سكان غير عادية، سادس حاجة التشطيب زي الزفت، سابع حاجة بقى السعر 170 ألف ما ينقصش جنيه.. لو حابب تعرف بلاوي أكتر عنها اتنيل اتصل على الزفت الرقم ده وعليه وهباب واتس برده".

ولاقى الإعلان رواجا عبر العديد من المجموعات المتخصصة في بيع العقارات على فيسبوك.

وتواصل "مصراوي" مع صاحب الإعلان، الذي أكد أنَّه قصد كتابة الإعلان بهذه الطريقة للفت الأنظار وانتشارها بين الناس على أوسع نطاق.

وأوضح أنَّه بالفعل تم انتشار الإعلان بشكل كبير وتداوله العديد من روَّاد مواقع التواصل الاجتماعي، إلا أن الشقة لم تُباع حتى الآن.

وذكر أن الشقة مواصفاتها جيدة ومناسبة عكس ما تضمَّن الإعلان وكاملة التشطيب أيضًا.