الدولار بـ16 جنيه في الخطة.. كم تتحمل الدولة بعد تأجيل زيادة أسعار الكهرباء؟

كتب - محمد عمارة:

قال الدكتور مصطفى مدبولي، رئيس مجلس الوزراء، إن الدولة المصرية بذلت جهدا هائلا لتوفير حزمة الحماية الاجتماعية.

جاء ذلك في مؤتمر صحفي عقده مدبولي بعد الاجتماع الأسبوعي لمجلس الوزراء، اليوم الأربعاء.

وأوضح مدبولي أن تأجيل خطة تعديل أسعار الكهرباء لمدة عام سيكلف الدولة 43 مليار جنيه، لكن نعي تماما الظروف الاقتصادية التي تمر بها الأسر المصرية.

وأضاف: "عندما أعلنا عن حزمة الحماية الاجتماعية اللي قاربت من 67 مليار جنيه، لكن واحدة من القرارات دي، عشان تعرفوا الدولة متحملة إيه، كان جزء منها منزودش الكهرباء والمرافق الرئيسية في الفترة دي، وقررنا نمدها لـ30 يونيو المقبل، عايز أرجع لحضراتكم بالرقم، وقت ما اتعمل خطة إعادة الهيكلة على 6 سنوات، في 9 يونيو 2020، كان حاطط الخطة على سعر صرف 16 جنيه للدولار، والسعر ده مربوط على الغاز اللي بياخده، هو قال طبيعي لو سعر الصرف اتغير، هتتغير الأسعار".

وتابع: "خدنا قرار بعدم زيادة الأسعار لمدة سنة، النهاردة سعر الدولار حصلت فيه زيادة، الرقم فعليا نتيجة هذه الزيادة وعدم تطبيق القرار، الاتنين الدعم اللي هتتحمله الدولة في سنة واحدة بنتكلم في 43 مليار جنيه، يعني احنا هنشيل المبلغ ده، غير الـ67 مليار بتوع الحزمة الاجتماعية، عشان تعرفوا الدولة بتحاولوا إزاي تقلل وتشيل عن الأسر".