قصص مثيرة في حياة مارادونا.. محمود سعد: كان مدمن والإيطاليين عملوا كنيسة باسمه

كتب- إسلام لطفي:

سرد الإعلامي محمود سعد، قصة في حياة لاعب كرة القدم مارادونا، حتى يستفاد منها وتكون سببًا في نجاح من يستمع إليها، وذلك لمناسبة فوز منتخب الأرجنتين في كأس العالم.

وقال خلال بث مباشر له: مارادونا كان أدمن لفترات طويلة وتعب جدًا ومقدرش يبعد عن الإدمان رغم أنه كان بيروح المصحة، ولكن في لقاء له سألته الصحفية عن الحاجة إللي مش هيعملها إذا عادت به الأيام، وقال إنها إدمان المخدرات، وأنه كان هيبقى أعظم بكتير مما هو كان عليه في كرة القدم.. ولكن عبارة واحدة كانت السبب في أنه يقلع عن الإدمان من غير علاج ولا مصحة وهي لما بنته قالتله "قوم يا بابا لاعبني زي ما كنت بتلاعب أختي" ولما مقدرش يقوم قرَّر أنه يعتدل ويبتعد عن الإدمان.

وأضاف: الإيطاليين يحبوه أوي عشان أحيا نادي نابولي، وخلاه ياخد الدوري مرتين، ونكتشف أنهم عملوا كنيسة لمارادونا في إيطاليا واسمها الكنيسة المارادونية، وبيقولوا عنه القديس مارادونا وكان أعظم لاعب في التاريخ.. وراح يدرب فريق في المكسيك، ولما راح البلد شهرتها بلد مخدرات وقتل وجرائم، ووصفوه أنه فاشل ولكن حول الفريق تحول فظيع جدًا.

ووجَّه رسالة لمتابعينه قائلًا: احرص على أن يبقى فيه بيشتمك، لأنك كده بتعمل حاجة، إنما الناس كلها بتجاملك مينفعش، وكده فيه حاجة غلط، لازم يكون فيه ناس مش مرتاحة، لأنك بتكبر وتعمل حاجة، الحياة عاوزه كده.

وتابع: أوعى حد يقولك أنك فاشل فتبقى فاشل، الحاجة الوحيدة اللي بتثبث إن كنت أنت فاشل أو ناجح أو أنك تفشل وتحاول تاني فتنجح فتلاقي حاجات في الحياة.