قناة السويس.. محمود سعد: أحد أهم المشروعات العالمية الكبرى و"المصريون شقوها"

كتب- إسلام لطفي:

سرد الإعلامي محمود سعد، قصة إنشاء قناة السويس، معتبرًا إياها من أهم المشروعات العالمية الكبرى، قائلًا: "المصريون هما اللي شقوا القناة".

وأضاف في بث مباشر له عبر صفحته في موقع التواصل الاجتماعي "فيسبوك": "كل الكلام عن قناة السويس العظيمة، بتكون عن الخديوي إسماعيل والوالي سعيد كان قبله هو اللي عمل كل حاجة من أيام الفرنسيين لما دخلوا مصر وبدأت الفكرة تظهر، الفكرة موجودة في عمق التاريخ".

وتابع: "الوالي سعيد هو اللي مضى العقود وعمل كل حاجة تخص القناة، وشاءت الأقدار أنه يموت، ويأتي بعده الخديوي إسماعيل بن إبراهيم بن محمد علي، اللي حضر كل حاجة وهو اللي عمل كل حاجة في الافتتاح الشهير لقناة السويس اللي حضره عظماء العالم وأراد أن يوريهم عظمة البلد اللي بيحكمها".

واستطرد: "نتعلم من قصة إسماعيل لما اتسبب في زيادة الديون على مصر، أنه مفيش إنسان صالح في المطلق، ولما يكون عندنا حد عاوزين نبص عليه بصة كويسة لا بد نشوف عمل إيه كويس وعمل إيه وحش".

واستكمل: "قناة السويس من أهم المشروعات العالمية الكبرى، وكل الأخطاء الخاصة بتكاليف الافتتاح والقصور التي اتعملت ممكن نركنها شوية لأنه اتعمل مشروع كبير".