السيسي: صندوق قناة السويس كان يتطلب مؤتمرًا صحفيًّا قبل وصوله للبرلمان

كتب- محمد نصار وأحمد السعداوي:

تحدث الرئيس عبد الفتاح السيسي، عن المشروعات المنافسة لقناة السويس، خلال افتتاحه، اليوم الإثنين، مصنعَي إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة.

وأضاف الرئيس السيسي مخاطبًا الحضور: مش ساعات بتقولوا فيه مشروعات هتتعمل قد تؤثر على دخل قناة السويس في يوم من الأيام؟ مش بتقولوا كده؟ طيب ده يخليني أعمل إيه؟ هيتأثر بنسبة 10% مثلًا دخل القناة، ده كلام نظري خالص بس برد علي..

وتابع الرئيس: لازم يبقى عندي دخل وأعمل مشروعات تانية وشركات تانية وأقدر بالملاءة المالية الموجودة أدخل في مشروعات بأكتر من كده بكتير؛ لأن المشروع هياخد سنة واتنين وتلاتة علشان يخلص.

وأضاف الرئيس السيسي: فيه ناس خايفة مش مغرضة، والخوف بقى سمة موجودة عندنا.. مش مصدقين إننا نقدر نعمل؛ لأ إحنا نقدر نعمل وإن شاء الله هنعمل وهتشوفوا.

وقال السيسي بشأن صندوق قناة السويس: كان مفروض قبل الأمر ما يُثار في البرلمان يتعمل مؤتمر صحفي ويُطرح للناس الأمر ويقول لهم الحكاية كذا.

وأضاف السيسي: النهارده لو جيت طرحت شركة قناة السويس في بورصة للمصريين فقط؛ علشان يبقى الناس اللي هتشتري الأسهم من المصريين بس.. في فرق أقول القناة دخلها كده، وأن أقول في أموال سائلة في البنوك 200 أو 300 مليار جنيه.

وتابع الرئيس: أنا مش اقتصادي؛ بس الاقتصاديين يردوا عليَّ.. من الأفضل يتقال إن القناة لها حسابات في البنوك فيها 100 مليار أو 200 مليار؛ ده مستوى تاني خالص أكتر من اللي موجود.