ناوي يقتلها من رمضان.. والد نيرة يكشف لمصراوي مفاجآت بعد ذبح ابنته أمام جامعة المنصورة

كتب- محمد عمارة:

كشف أشرف عبدالقادر والد الطالبة نيرة عبدالقادر التي ذبحها زميلها أمام جامعة المنصورة، تفاصيل جديدة عن الجريمة.

وقال عبدالقادر، في تصريحات خاصة لمصراوي: "أنا مش هعمل عزاء غير لما يتحاكم على جريمته، مش عامل عزاء والله، مش هاخد عزاء بنتي دلوقتي، هعمل عزاء يوم يتحاكم عليه، هقدر ساعتها أخد حقها، أخد عزائها إزاي ودمها لسه مبردش".

كان أهالي منطقة الجمهورية بمدينة المحلة الكبرى، شيعوا مساء أمس الإثنين، جثمان الطالبة نيرة عبدالقادر من مسجد الروضة بمنطقة الشعبية، إلى مقابر العائلة بالمدينة.

وكشف عبدالقادر لمصراوي: "الولد بيحبها بقاله سنتين، وجالي وقولتله يا ابني هي مش عايزة، هي مش عايزة تتجوز دلوقتي خالص، لا أنت ولا غيرك، هي بتدور على مصلحتها ومستقبلها، وروحت بيت أهله عشان أشتكي ليهم، قالوا لي أنت عايز تجوز بنتك ليه؟ قولتلهم لأ، ده اللي عامل لينا مصايب، والناس شاهدة على الموضوع ده، وعملت له كذا محضر، وفي الآخر يدبحها كده".

وأوضح والد نيرة: "عملت له محضر في شرطة الانترنت، عشان كان فاضحنا، عملت محضر في قسم أول، عملت المحضر يوم 13 أبريل اللي فات، عملت المحضر عشان كان بينشر صور ومبهدلنا آخر بهدلة، ومعرفش إنه مرقد لها، بيقولهم في النيابة ساعة ما اعترف أنا ناوي أقتلها من شهر رمضان، يعني ناوي يقتلها من شهر رمضان".

وعن صحة ما قالته رئيس قسم اللغات الشرقية في جامعة المنصورة بشأن تفوق المتهم بقتل ابنته، قال أشرف عبدالقادر: الغريب إنه ذكي جدا ومشغل ذكائه علينا احنا، بهدلها آخر بهدلة".

وعن صحة خطبة ابنته من شخص آخر، وهو ما آثار استياء المتهم، قال والد نيرة: "ولا هتتجوز خالص، لا اتخطبت ولا كانت ناوية تتخطب، كل ما يتقدم لها حد تقولي يا بابا أنا بدور على مستقبلي، مش عايزة أتجوز وأقعد في البيت".

وعن الفيديو المنتشر لوالدة المتهم بشأن إقامة فرح لخطبة نيرة من شخص آخر، قال أشرف: "ولا عملنا فرح ولا حاجة، يعني هنخطبها ونداري، اتقدم لها معاون مباحث في القاهرة، واتقدم لها معد تلفزيوني وقالت له لأ".

وأكمل: "المتهم في حي أول، وأنا في حي تاني، هو في شرق البلد، وأنا في غربها، المعرفة جت في الجامعة".

كانت مدينة المنصورة، شهدت جريمة بشعة صباح أمس، بعدما قام طالب بكلية الآداب بجامعة المنصورة بطعن زميلته بسكين وذبحها قبل أن يتمكن الأهالي من الإمساك به.

تلقي اللواء سيد سلطان مدير أمن الدقهلية إخطارًا من اللواء إيهاب عطية، مدير المباحث الجنائية، يفيد بورود بلاغ لشرطة النجدة من طلاب جامعة المنصورة بقيام أحد الطلاب بإخراج "سكين" وطعن زميلته بها وذبحها قبل قيام الأهالي بالإمساك به والاعتداء عليه بالضرب، وذلك أمام بوابة "توشكي" لجامعة المنصورة من ناحية حي الجامعة.

انتقلت سيارات الإسعاف وضباط مباحث قسم أول المنصورة لموقع البلاغ، وبالفحص تبين مصرع "نيرة.أ.م" طالبة بكلية الآداب جامعة المنصورة، ومقيمة في المحلة الكبرى بمحافظة الغربية، وذلك بعدما قام زميلها ويدعى "م.ع" 21 سنة، طالب بكلية الآداب بجامعة المنصورة، ومقيم بالمحلة الكبرى بمحافظة الغربية، بطعنها بسكين وذبحها من الرقبة قبل أن يتمكن الأهالي وطلاب جامعة المنصورة من الإمساك به.

​