"بابا وماما كانوا فين؟".. الجلاد يعلق على قضيتي كريم الهواري وابن وزيرة الهجرة (فيديو)

كتب : مصراوي

علق الكاتب الصحفي مجدي الجلاد، رئيس تحرير مجموعة "أونا" للصحافة والإعلام التي تضم مواقع (مصراوي، يلاكورة، الكونسلتو، شيفت) على اتهام ابن وزيرة الهجرة والمصريين في الخارج بالقتل، والحكم على "كريم الهواري" ابن رجل الأعمال الشهير بالحبس 3 سنوات في قضية قتل 4 شباب.

وقال الجلاد في برنامجه "لازم نفهم" عبر صفحته الشخصية في "فيسبوك"، إن السؤال الأساسي في الحادثتين: "إزاي بنربي ولادنا؟.. كيف نربي أبناءنا في هذا الزمن الحديث وفي زمن فتنة التكنولوجيا والتواصل الاجتماعي والانفتاح الشديد الذي جعل العالم كله قرية صغيرة".

وأضاف الجلاد: "هو ليه دا حصل.. هو بابا كان فين؟.. وماما كانت فين لما دا حصل؟.. ليه بنلوم نفسنا ونندم بعد ما المصيبة أو الواقعة تحصل"، متابعًا: "هل بنتعظ وبنتعلم من دا؟ التربية مسئولية كبيرة جدًا في كل الأديان، الأبناء أمانة ربنا أدهالنا وإحنا مسئولين عنها".

واستكمل: "فيه سؤالين مهمين قبل مندي ولادنا وسائل تقضي عليهم، لو أنا عايز أعلم ابني برا، هل دا هدف ولا وسيلة عشان يبقى حاجة كويسة؟ هل تركيبته النفسية والوجدانية والعاطفية مناسبة عشان أبعته برا وهو في سن صغيرة وأسيبه يربي نفسه أو المجتمع اللي هو رايحه؟".

وأضاف: "السؤال التاني، هل سألت نفسي قبل ما أديله كل دا، أنا غرست فيه أيه منذ اليوم الأول لميلاده؟ ولا كنت بجري ورا أحلامي والسلطة والنفوذ والمال، وناسي أولادي وسايب الأيام والأصدقاء يربوهم؟ هل أنا أهلّته للخطوة دي وهل أديت الأمانة؟ حتى أفاجأ بهذه الكارثة.. مسألناش نفسنا قبل ما أدي ابني عربية وفلوس، سألت نفسي أنا ربيت إزاي؟ أنا علمته قيم ومبادئ وأخلاق وهل تابعته أنه بيتعاطى أو أحواله مش طبيعية؟ طب لو حصل هل حاولت أعالجه أو حاولت وفشلت؟ السؤال بابا كان فين وماما بتعمل أيه؟".

واختتم الجلاد: "أنا لا أسيئ لأحد، الجميع على رأسي من فوق وربما ارتكب أنا نفس الأخطاء، بس بقولكم وأقول لنفسي إحنا فين من تربية ولادنا.. لابد أن أمتلك الثقافة والوعي والتكوين اللي تخليني استخدم المال صح وبرضو ثقافة استخدام السلطة وإزاي أوازن بين السلطة والواجبات الأسرية والاجتماعية.. عمر ما كان الوقت اللي بتبذله في تربية ابناءك أرخص من الوقت التي تجمع فيه الأموال".