السيسي يرد على مزاعم تسبب المشروعات القومية في الأزمة الاقتصادية

كتب- محمد عمارة:
ردّ الرئيس عبدالفتاح السيسي، على مزاعم تسبب المشروعات القومية في الأزمة الاقتصادية الراهنة، ضاربًا المثل بما حدث من تطوير لقناة السويس.

وقال الرئيس السيسي في كلمته خلال الاحتفال بعيد الشرطة الـ71: "هتكلم على ما يتردد بأن الأزمة سببها المشروعات القومية.. وهسأل يا ترى، هل ممكن قناة السويس اللي كان دخلها 4 ونصف مليار دولار، منطورهاش، ويبقى دخلها السنادي 8 مليار دولار، ولا نستفيد من التجارة العالمية؟.. هل الرقم ده جنب الرقم اللي تم بتطوير القناة ساعتها، يعتبر رقم كبير".

وأضاف: "أزمة الكهرباء والطاقة اللي كلنا فاكرينها، على الأقل صرفنا 1.5 تريليون جنيه، هل ممكن الدولة المصرية تستمر.. إحنا زدنا 14 مليون نسمة، هل كان ممكن منعملش تطوير عشان الزيادة والتنمية... فيه محاولات دائما لتضليل الناس وياخدوهم في حتت تانية خالص، أنا واثق في الناس".

واستكمل الرئيس السيسي حديثه عن أهمية المشروعات القومية بالقول: "هل كان ممكن الموانئ المصرية يكون لها دور في التجارة العالمية؟ موانينا في مصر متكنش جاهزة للتطوير والتنمية، هل شبكة الطرق والنقل اللي واصلين لـ2 تريليون جنيه، هل كان ممكن نسيبها كده... اضطرينا نعمل كل حاجة، مكنش عندنا ترف نقول أولويات، ووالله ما أقصد حاجة، كل الملفات كانت محتاجة جهد عشان البلد تستطيع المواجهة".

وتحدث الرئيس عن تطوير شبكة الطرق في مصر: "طب لو الشبكة مكنتش اتعملت، كانت الناس هتمشي إزاي؟ مش بس في القاهرة والإسكندرية، مكنش عندنا سوء تقدير في الموضوع ولا ترف في الموضوع، بس خلي بالكم، حجم وقدرة الدولة أد إيه، عشان يتعمل في مدة 7 سنين".

وتابع: "أطلقنا مشروع حياة كريمة من سنة ونصف وقلنا نستهدف نخلصه من 3 سنين.. عايزين نغير حياة 60 مليون بني آدم في مصر، مكنش ده ترف أو مبالغة، مكنش ينفع نسيب حياة الناس ونقول الخطة تتعمل في 20 سنين، قلنا 3 سنين، حطينا رقم كبير، ولما نزلنا قلنا محتاجين وقت وفلوس أكتر، طب هل كان ممكن نأجل أو يتعمل على مراحل على سنين طويلة، كل يوم بيعدي بدون ما تعمل تطوير، فيه ناس بتتعذب".

وأضاف الرئيس السيسي: "بتكلم على مشروعات كان لازم تتعمل، بالمناسبة مبخشش معاكم في تفاصيل كتير، الدكتور شاكر موجود، عايز أقولكم عشان نطور قطاع الكهرباء، مكنش بس الهدف أعمل محطات جديدة، كان لازم أجدد الشبكة وأعمل شبكة جديدة، اضفنا ضعف الشبكة مرتين، طيب النقطة التالتة، انت بتقول عايز تبقى مركز للطاقة الكهربائية، إزاي تعمل ده وانت الشبكة عندك غير مؤهلة، كان لازم يبقى عندي طاقة مناسبة وشبكة ومحطات للتحكم في الشبكة دي بالكامل".