السيسي: "البلد دي عايزة 70 تريليون جنيه مش 7 تريليون"

كتب- محمد نصار:

قال الرئيس عبد الفتاح السيسي إن الدولة المصرية تحتاج لـ 70 تريليون جنيه، مؤكدا: البلد دي عاوزة 70 تريليون مش 7 تريليون ويا رب يعلمنا ويفهمنا إن إحنا نشوف واللي نشوفه نفهمه.

جاء ذلك خلال كلمته في افتتاح عدد من المشروعات القومية في سوهاج، اليوم الخميس.

وأضاف الرئيس: اللي بنعمله في سوهاج 100 وحاجة مليار طيب في كام محافظة واللي ناقص أد إيه!، طيب واللي اتعمل تشغيله بكام، لو عملت مكتب بريد أو مدرسة أو مستشفى تشغلهم بكام وتحافظ عليهم بكام، كل يوم وكل شهر وكل سنة.

وتابع السيسي: لو أنتم ماخدتوش بالكم يا شباب مصر، اللي بنقوله محاولة الوصول للأرقام الطبيعية بالنسبة للمعدلات العلمية اللي بتقول نعمل كام مدرسة لكل كام طالب، أنت ماشي في سبق، لأن عندي أولا نقص في الفصول، وعدد الفصول ده بيقابله تقديم خدمة تعليمية لأولادنا والعدد ده أقل من المطلوب بمنتهى البساطة كده.

وواصل: أنت الأول عايز تسد الفجوة بين اللي موجود واللي مفروض يكون موجود ثم كل سنة تعمل الحجم المطلوب للقادم، لو بيدخل في التعليم النهاردة 2 مليون أو مليون شخص يبقى عايز تزود كام فصل 60 ألف ده بفرضية إن إحنا قفلنا الفجوة الحالية، طيب الفصل بكام، لو عايز أعمل 60 ألف فصل عايز على الأقل 60 مليار جنيه ثم أحط معاهم المدرس والطقم الإداري بكام ومنين، طيب بأقول الكلام ده ليكم ليه، لما ألاقي حلم عند الشباب وممكن يتعمل منه حاجة مقولش ربنا يوفقه، يمكن يجيبلي حاجة، وحاجة جنب حاجة جنب حاجة البلد دي موقفها يتغير.

وأضاف الرئيس السيسي: أنا أعرف كويس يعني إيه قرش، وأعرف يعني إيه دولة، ولازم نكون فاهمين إن لو إحنا مستمرين بالطريقة دي كل الجهد اللي هيتعمل مش كفاية.