"بحس أنهم بلاستيك".. محمود سعد يعلق على عمليات التجميل للسيدات

كتب- إسلام لطفي:

استنكر الإعلامي محمود سعد، لجوء بعض السيدات إلى الخضوع لعمليات تجميل بشكلٍ مبالغ فيه، ما يسبب تغيير كبير في أشكالهنَّ بطريقة غير لائقة.

وقال خلال بث مباشر له عبر صفحته الرسمية على "فيس بوك": الستات اللي بشوفهم منفخين ببقى مضايق منهم جدًا، وحاسس إني قاعد مع قطع بلاستيك، مع كل التقدير ليهم، لكن فيه نوع من التجميل أظن أنه مقبول.

وردَّ على سؤال وجهه له أحد المتابعين "أنت عامل بوتكس؟"، قائلًا: مبعملش حاجة الحمد لله، ومبتفرقش معايا الحاجات دي.

وأضاف: كنت زمان مش بتبسط أبدًا بالراجل اللي يصبغ شعره، وقولتها زمان في برنامج البيت بيتك إني مبحبش الراجل اللي بيصبغ شعره، وتصبغه ليه أنت عاوز إيه؟

وتابع: ولما كبرت وشعري بقى أبيض لقيت إن اللي عاوز يصبغ شعره هو حر، ما دام هو مبسوط كده، لكن بتاخد شوية لما بلاقي حد صابغ شعره لكن مقولش عنه حاجة هو حر.. إنما بوتكس والحاجات دي لا مبعملهاش واللي بيقصلي شعري هو هو بقاله يجي 15 سنة.

واستطرد: والممثل ممكن يعمل بوتكس عشان يعمل أدوار تمثيلية ورجل أعمال عاوز يتبسط وباين أن كله حيوية هو حر، ودلوقتي مبقتش ضد الحكاية دي واللي عاوز يعمل حاجة يعملها.