لا تنسوا الفضل بينكم.. السيسي يعلق على التصريحات المسيئة للسعودية: "الموضوع بدون أساس"

كتب- محمد نصار:

علق الرئيس عبد الفتاح السيسي على الجدل الدائر والتصريحات المسيئة عبر مواقع التواصل الاجتماعي بشأن علاقة مصر مع المملكة العربية السعودية.

وقال الرئيس السيسي، خلال افتتاح المرحلة الثانية من مشروع "سايلو فوودز" في مدينة السادات، اليوم الخميس: في موضوع عايز أتكلم فيه، وأرجو إن إحنا كمواطنين وحتى كإعلاميين ننتبه له، سياسة مصر دائما سياسة تتسم بالاعتدال والتوازن والانضباط الشديد تجاه الجميع في الداخل والخارج.

وأضاف الرئيس: أتابع مواقع التواصل وبشوف ساعات بيبقى فيه حماس زيادة أو حتى مش عايز أقول "تجاوزات في الكلام وكده"، مش بتكلم عن موضوعات محلية، بتكلم عن موضوعات خاصة بعلاقاتنا مع أشقائنا وده أمر يا جماة ننتبه ليه كويس، وخلي بالكم ده بيعكس مدى فهمنا وتقديرنا للعلاقات مع الأشقاء.

وتابع الرئيس: بالتالي لما يتم تناول موضوع بدون أساس، ملوش خلفية يعني، إحنا بنقعد ونتكلم ونقول أمور قد لا تكون لها أساس من الصحة بصراحة، هنمشي ورا بعض المواقع المغرضة اللي عايزة تعمل فتنة بيننا وبين الأشقاء!، أقل حاجة نعملها لو مش هنقول كلام طيب، يُفضل نسكت.

وواصل السيسي: إحنا مش بنكتب إلا دايما لصالح تحسين ودعم العلاقات مش العكس، وإحنا علاقتنا طيبة بالجميع وده منهج ماشيين بيه مش من النهاردة، ولكن ده مسار بننتهجه من تولي المسؤولية.

وقال السيسي: حتى في الأزمات والخلافات الكبيرة، مفيش تصريحات سلبية أبدا وكل كلامنا منضبط جدا، وبالتالي ميصحش نُسيئ لأشقائنا وماننساش وقفة أشقائنا معانا.

وأكد الرئيس: أنا هقول فرضية مش موجودة، لو في أزمة، أنا أطول لساني أو أقول كلام مش مظبوط، ده كلام لا يليق أبدا، فين: لا تنسوا الفضل بينكم، وحتى بعض المقالات اللي أشوفها مع أشقائنا في المملكة العربية السعودية أو أي دولة أخرى، إحنا حريصين وده توجه دولة وأرجو كلنا كموطانين لا ننسافق وراء مواقع تقصد الفتنة بيننا، علاقتنا طيبة بالكل والجميع، وفي أصعب الظروف، حتى لو في خلاف مع دولة شقيقة خلال السنين اللي فاتت هنتجاوزها.