توثيق الطلاق وجوبي.. مفتي الجمهورية: 300 ألف فتوى طلاق لم يقع منها إلا حالتان

كتب- محمد عمارة وأحمد السعداوي:

قال الرئيس عبد الفتاح السيسي إن صندوق دعم الأسرة سيغطي النفقة وكل المصاريف، وهذه المبالغ ستُفرض على كل مسلم ومسيحي؛ عشان هتتصرف للكل.

وأضاف الرئيس السيسي، خلال احتفالية تكريم الأمهات المثاليات اليوم الإثنين، أن الدول الحديثة هي دول تنظر إلى كل المشكلات وتعمل منظومة حل مش وجهات نظر، مش جمعية تعمل عمل خيري بس.

وقال المستشار عمر مروان، وزير العدل: كان فيه رقم سلبي شاع في المجتمع إن نسب الطلاق السنوية 34%، سيادتك وجهت بالبحث بالتعاون مع جميع الأجهزة، وجبنا كل البيانات، اكتشفنا إن النسب السنوية للطلاق 3%، طب جه منين الرقم 34%.. كان فيه خطأ في التنسيب، اللي اتطلقوا مثلًا في 2020 دي زيجات من سنوات سابقة، كنا بنحسب حالات طلاق عن سنة واحدة، نسبة الـ3% موجودة، ونسبة الطلاق عالية في السنة التانية، عملنا في القانون أحكام تحد الطلاق، مفيش حاجة مبنية على هوى.

وتابع مروان: نسبة الطلاق بتقول إن المجتمع بخير وقوي والأسر متماسكة، والنسبة الزيادة اللي شاعت عملت حالة سلبية والكلام ده مش واقعي، نسب الطلاق السنوية 3%، لو عايزين ننسب 10 سنين طلاق، نحط 10 سنين زواج.

وقال الرئيس السيسي: كنت اتكلمت في ده قبل كده، قُلت عايزين نعمل توثيق للطلاق، وساعتها حصل نقاش كبير، طب ليه مهم نعمله دلوقتي؟! عمرنا ما نعمل إجراء يخالف شرعنا، ولكن الكلام بقى في كل المجتمعات، مفيش ضبط للكلام، يبقى فيه ضبط للتصرف، في النهاية لما أعمل قانون إن الطلاق هو اللي بيتم قدام مأذون وموثَّق، لو فيه إثم، مين هيشيل الذنب يا معالي المستشار؟

وأضاف السيسي: الموضوع بيتم مناقشته في البرلمان، من كل الناس.. لكن في النهاية فيه ضرر وأكثر ضررًا، هشيل الأكثر ضررًا حتى لو كان بضرر.

وقال المستشار عمر مروان، وزير العدل: كنت اتناقشت مع فضيلة المفتي، ليه بنقول نوثَّق، عشان نتحقق من وقوعه، فضيلته قال لي إحصائية، عدد الإفتاءات اللي وردت 240 ألف حالة طلاق، اللي وقع صحيح، حالتان فقط، وقال لي توثيق الطلاق وجوبي.

ورد الدكتور شوقي علام ، مفتي الجمهورية، قائلًا: بالفعل على مدى 5 سنوات، عملنا فتاوى طلاق على 5 مراحل، كل شهر 5 آلاف فتوى، حوالي 300 ألف فتوى.. الطلاق لا يقع إلا عندي، الطلاق لم يقع إلا في حالتَين وقلت لهم روحوا وثقوا طلاقكم.