دي وقائع.. السيسي يكشف خطة الإرهابيين للسيطرة على سيناء

كتب- إسلام لطفي:

تحدث الرئيس عبدالفتاح السيسي، خلال الندوة التثقيفية الـ37 للقوات المسلحة بمناسبة الاحتفال بيوم الشهيد، قائلًا: هكلمكم كشاهد عيان إزاي الموضوع ده حصل وهقوله عشان تعرفوا ان مفيش حاجة بتتعمل وليدة اللحظة، ده فكر وخطة وترتيب وإجراءات بتتعمل عشان في النهاية ندخل في اللي دخلنا فيه العشر سنين اللي فاتوا، وأنا مش بقول حكاية وبقولكم وقائع.

وأضاف: كنت نائب مدير المخابرات في 2009، فكنا بنعمل لقاءات عشان مناقشة الوضع الأمني في سيناء، فكانت اللقاءات بتتعمل ووقتها مدير المخابرات اللواء مراد موافي وكان رئيس جهاز الأمن الوطني اللواء حسن عبدالرحمن، فكنا شايفين أنه خلال 7 سنين اتشكلت بنية أساسية ضخمة في شمال سيناء عبارة عن مخازن للأسلحة والذخيرة والمفرقعات وأيضًا بنية بشرية كبيرة للسيطرة.

وتابع: وكانوا ساعتها لو رجعتوا على مواقع التواصل هتشوفوا أن كان فيه أفلام ليهم وهما بيعملوا عروض كأنهم خارج الدولة، وكان الكلام وقتها أن فيه مشكلة موجودة في سيناء وكانت المشكلة أن الكتل اللي اتشكلت على مدى السنين اللي قبل 2008 و2005، بقت محتاجة جهد وعمل عسكري كبير مش بس بالشرطة ولكن شرطة وجيش عشان تحل المسألة دي.

واستطرد: ده محصلش وكانت فيه ظروف واتفاقيات فكانت القوات الموجودة شرطية محدودة وقوات الجيش موجودة على خط أ بس، وفضل الموضوع كده وبانت المؤامرة بأبعادها الكاملة في 2011، والناس مشغولة في الميدان كان بيتم تخريب وجود الدولة المصرية في سيناء والقضاء عليه من أقسام ومديريات وكل ما يتعلق بمصر.