كملها بقى يا شعب

بقلم – خالد النبوي:

سعاد والا فاتن ؟

لأ سعاد طبعا.. هي فاتن تعرف تغنى وترقص زي سعاد ما تشوف يا عم بانوا بانوا وانت تعرف الفرق

يا عم هي سعاد تعرف تعمل دعاء الكروان؟

شفت المشهد الأخير و أحمد مظهر بيموت بين إيديها؟ ده مشهد متعملوش غير أستاذه في التمثيل زي فاتن حمامة

برضه سعاد حسني.. لأ فاتن.. لأ سعاد

عبد الحليم.. لأ فريد.. لأ عبد الحليم حافظ

طب عبد الوهاب.. لأ رياض السنباطي.. لأ عبد الوهاب

يوسف إدريس.. لأ نجيب محفوظ..لأ يوسف

كاريوكا.. لأ ساميه جمال

طب أم كلثوم ..لأ أسمهان

ورده..لأ فايزه أحسن

يوسف شاهين ..لأ صلاح أبو سيف

العقاد ..لأ طه حسين

طب الشيخ مصطفى إسماعيل أحسن واحد يقول الآدان.. لأ الشيخ محمد رفعت

طب عبد الباسط عبد الصمد أحسن واحد يقرا القرآن ..لأ الطبلاوي

النقشبنىدى..لأ نصر الدين طوبار

أحلى معبد الكرنك..لأ معبد هابو

أعظم حرب خاضها الجيش حرب الاستنزاف..لأ حرب أكتوبر

طب 25 يناير.. لأ 30 يونيه..لأ 25 يناير..لأ 30 يونيه ..لأ 25 يناير

ههههههههههههههه

هو انتي إيه يا مصر مش هتفرحي للآخر أبدا؟ والا إحنا اللي بننغص عليكي فرحتك؟!!

هو انت يا بلدي عندك فدان شطارة وحظك مفيش؟

يا بلدي شعبك مليان تنوع لكن لا يحتمل تنوعه ..وكل ما نبتدي خطوه منكملهاش

نتحد في الميدان ونناول بعض الأكل والميه ونعالج بعض ونحقق هدف الميادين وبعدين نبص حوالينا نلاقى نفسنا في وش بعض

ناجحين مع بعض ..نقوم على طول نقاتل بعض في كل مكان وعلى أي شيء وكل شيء

زي ما يكون فيه قوه عليا عايزه لنا هدف يوحدنا لفتره محدده فقط وبعد كده بيبقى المطلوب إن الهدف يختفى عشان نجاحنا يبقى محدود برضه

طب إذا كانت الحكاية كده وإحنا عارفين.. ليه إحنا اللي بنساعد أعدائنا علشان ينجحوا في خطتهم؟!!!!!!!!!!!!!!!!!!!!!!!!!!!!

ليه مش قادرين نتحمل تنوعنا؟ ليه مش عايزين نستغله؟ ليه مش قادرين نكمل لنهاية الطريق؟

ليه بنتفرغ لهدم بعض واهانه بعض فى الشارع وفى الشغل وعلى شبكات التواصل الاجتماعي(فيس وتويتر)

ليه مش مقدرين حجم تنوعنا ؟؟ ليه مش مقدرين حجم ثرواتنا؟

ليه بنرجع تانى لنفوسنا الفاسدة اللي ثرنا عليها ؟هل إحنا فعلا عايزين نغير من نفسنا عشان ربنا يغير ما بنا؟؟

مش هو ده شرط ربنا في التغيير؟؟

(إن الله لا يغير ما بقوم حتى يغيروا ما بأنفسهم.. صدق الله العظيم)

حقيقه واحده علينا نتذكرها دايما .. ويارب الذكرى تنفع المؤمنين

نحن الشعب المصري نمتلك سعاد وفاتن وأم كلثوم وعبد الوهاب والسنباطى وعبد الحليم ووردة وفريد وفايزة والطبلاوي وعبد الباسط ومصطفى إسماعيل ومحمد رفعت ويوسف شاهين وصلاح أبو سيف وحسنين هيكل ومحمود عوض وزكي نجيب محمود وتحيه كاريوكا وساميه جمال ونجيب محفوظ ويوسف إدريس والعقاد وطه حسين ومجدى يعقوب ومحمد غنيم والنقشبندي ونصر الدين طوبار والبابا شنودة والباقوري

نحن الشعب المصري نمتلك الأزهر والكاتدرائية

الشعب المصري أحفاد الأجداد الذين بنوا الكرنك وهابو وأبو سمبل والأهرامات وأبو الهول

نحن أبناء العظماء الذين حاربوا الاستنزاف وأكتوبر

نحن من قام وألهم العالم في 25 يناير واستكملناها فى 30 يونيه( وما بينهما كثير قمنا به) وسنستكملها حتى نحقق أهداف 25 يناير

عيش.. حرية.. عدالة.. كرامة

علينا أن نثق في ذلك وعلينا أن نثبت أن مصر تمتلك فدان شطارة وإن حظها مش قليل.. علينا أن نتوحد في هذه اللحظة النادرة

كي تتحقق أحلام شهداء 25 يناير وأحلام من تبعوهم في 30 يونيه

عشان ييجي بقى اليوم اللي مصر تفرح فيه للآخر.. تفرح فيه بقياده شبابها

كملها بقى يا شعب.. أيوه بقى