البنت!

"يا عيني دول ٣ بنات بس ملهمش أخ ولد ياخد باله منهم بعد موت ابوهم!"

فا الحقيقة طظ في كل حد بيقول الجملة ديه، عارفين ليه؟

ببساطة لإن العربيات الصبح كلها بنات بيوصلوا ولادهم المدارس.. المستشفيات والعيادات كلها أمهات مستنية مع ولادها.. السوبر ماركت مليان ستات بتجيب طلبات الشهر.. النوادي مليانة أمهات مطحونة في تمارين ولادها وأمهات تانية خلصت تمارين وقاعدة بتذاكر لولادها وتحل معاهم الواجب.. مكاتب الصحة مليانة أمهات بتطعم ولادها.. المدارس مليانة أمهات بتتابع ولادها وتشتكي المدرس اللي زعل بنتها وتسأل عالرحلة إمتى والمنهج هيخلص إزاي.. وبعد دة كلة تلاقي الست اللي عملت كل دة مالية مكانها وناجحة في شغلها..

حضرتك احنا البنات اللي بنخلي بالنا من اخونا ومن ابونا ومن مامتنا ومن ولادنا وجنب كل دة بنخلي بالنا مع نفسنا..

احنا البنات اللي بنشيل مامتنا وبابانا في تعب السن الكبير وفي مرضهم ونستنى معاهم في العيادة بالساعات وبكل نفس راضية ووالله من غير أوف واحدة حتى من جوانا..

احنا اللي بنحافظ على العيلة والبيت..

احنا اللي بنستحمل وبنصون ونعدي عشان الحياة تفضل قايمة وماشية ويفضلوا ولادنا وسط اب وام..

احنا البنات اللي بنعمل كل وأي حاجة حواليكوا..

نصيحة ليكوا كدة الأخوات الولاد اللي ملهمش اخت بنت هم اللي يستحقوا جملة "يا عيني دة ملهمش اخت بنت".. لان بإختصار وبكل صراحة البنت هي الحياة بكل تفاصيلها هي الحماية والسند والضهر لكل اللي حواليها..