الدنيا ديه وحشة أوي!

"بجد الدنيا دية وحشة اوي والله...!"

هي فعلاً الدنيا وحشة، بس مش من نفسها كدة! هي وحشة بسببنا وبسبب اختيارتنا..

الحقيقة ان إحنا اللي اختياراتنا تقرف..

احنا اللي بنقبل ظلم اللي حوالينا لينا ونجبر نفسنا نسامح وكمان نضحكلهم ونقعد معاهم عشان نريح لهم ضميرهم!

احنا اللي بنقول نسينا واحنا فاكرين أصغر التفاصيل..

احنا اللي بنهرج واحنا مخنوقين وبنضحك واحنا مش قادرين.. 

احنا اللي بنحب ونخاف نقول..

احنا اللي بنكمل في علاقة لمجرد اننا خايفيين ننهيها.. 

احنا اللي حتى بنجبر نفسنا اننا نكمل في خروجة هنموت ونقوم منها ونرد على مكالمة ناس مش طايقين حتى نسمع اسمها بحجة "ميصحش!"..

احنا اللي بنخاف نقول "مخنوقين" او "تعبانين" وكإن التعب والخنقة ممنوع وجودهم جوانا..

احنا اللي بنجبر حياتنا دايماً تاخد عكس ملامح قلبنا..

احنا اللي بنكتب رسالة نفسنا نبعتها ونمسحها..

احنا اللي محتفظين في حياتنا بناس مش طايقينها..

احنا اللي بنخبي اللي جوانا ومستحيل نحكيه واحنا برضو اللي بنحكي في أي كلام ملوش اي علاقة باللي جوانا..

احنا اللي بناخد قرار الجواز عشان قالولنا "يلا اتجدعنوا".. 

واحنا اللي بنفارق حبيب عشان اتعودنا ان الحب معمول للنهاية والوجع والبكا.. 

واحنا برضو اللي اتعودنا وشربنا مبدأ ان الحب والعقل عكس بعض.. الحب للمراهقة والعقل للجواز!

احنا اللي بنتجوز ونعيش حياة كئيبة لاننا اتعودنا ان الجواز يعني قلبة وش ونكد.. 

احنا اللي بنمنع نفسنا نحس وبنجبر نفسنا نتأقلم عالقرف وبنقنع بعض ان الحياة يعني وجع! 

فا ها بقى برضو الدنيا هي اللي وحشة؟!

الدنيا هي اللي بتعمل كل دة فينا ولا احنا؟!

احنا اللي موحشين دنيتنا والله.. يارب نرحم نفسنا شوية..