مش... شرط!

كلمة الشرط... لها معانٍ كثيرة، فالشرط في اللغة مثلاً: أسلوب له مكوناته وأركانه، والشرط هو تعليق شيء بشيء، كأن نقول: (إن زرتني أكرمتك)، فالإكرام هنا متوقف على الزيارة، أما الشرط في القانون المدني فهو أمر مستقبل، وغير محقق الوقوع، ويترتب على تحقيقه وجود الالتزام أو زواله، كما نص المشرع بالمادة 256: (يكون الالتزام معلقًا على شرط إذا كان وجوده أو زواله مترتبًا على أمر غير محقق الوقوع).

والشرط في الحياة له قانونه ودروسه... فوجوده له معنى وعدم وجوده له معنى آخر... فمثلاً: مش شرط! إن زوجك الحنين والطيب والرومانسي يكون ده بسبب شطارتك في إنكِ عرفتِ تكسبي قلبه، وإن اللي زوجها سيئ... فاشلة ومعرفتش تكسبه، ممكن تكون الزوجة الفاشلة هذه مثالية أكتر منكِ، كل ما في الأمر إن ابتلاءكِ مجاش في الزوج...

مش شرط!، إنك لو صحتكَ حلوة ما شاء الله، وجسمك جميل ورياضي.. إن السبب يكون إنك واخد بالك من نفسك وأكلك صحي ومفيد، وإن النحيف أو التخين مش مهتم بصحته، ممكن يكون بيهتم بصحته أكتر منك، ولكن كل ما في الأمر إن ابتلاءك مجاش في صحتك.

مش شرط إن ولادك المؤدبين والأخلاق والمتفوقين.. إن السبب أنكِ أم مثالية وعرفتِ تربي. وإن اللي أولادها أخلاقهم ضايعة ومش متفوقين إنها أم فاشلة، ممكن تكون بتبذل جهد أكتر منك، كل ما في الأمر إن ابتلاءك مش في عيالك.

مش شرط إنك دخلت كلية عالية ودايما متفوق في حياتك العملية، إن ذكاءك هو السبب أو مهارتك، وإن اللي معاه دبلوم أو مش متفوق علميًا غبي، ممكن يكون أذكى وأشطر منكَ، كل ما في الأمر إن ابتلاءك مش في علمك وعقلك.

مش شرط إنك بتعرفي تتاجري وتجيبي فلوس بأي طريقة حلال. إن السبب فهلوتك وتحايلك على العيشة، وإن اللي مش قادرة تعيش في الغلاء فقيرة ومش ذكية، ممكن تكون حاولت كتير والظروف خانتها، كل ما في الأمر إن ابتلاءك مش في مالك.

إحنا مش آلة بترزق وتمنع، ولا إحنا قضاة على بعض، ربنا وحده هو اللي بيمنح ويمنع وفق رؤية إلاهية مش رؤية إنسانية، وكونك حصلت على رزق ما أو اتحرمت من حاجة ما، مش شطارة أو فشل منك، هو بس إرادة ربنا ورحمته وحكمته إنه بيعطي لنا المناسب مش اللي إحنا عاوزينه، وبيمنع عننا كل شر مهما إحنا رأيناه خيرًا، فرب خيرٍ لم تنله كان شرًا لو أتاك وحقيقي فعلا... مش شرط.