"ماتزودش أكتر من نص جنيه".. حملة لمواجهة استغلال التاكسي بدمنهور

البحيرة - أحمد نصرة:

عقب الزيادة الأخيرة في أسعار المحروقات، انطلقت حملة شعبية في مدينة دمنهور، تحت اسم "ماتزودش أكتر من نص جنيه" لمواجهة استغلال وجشع بعض سائقي سيارات الأجرة، والذين حاولوا استغلال الموقف بفرض زيادات مبالغ فيها.

وقال سراج الدين الطايفي، صاحب فكرة الحملة، إن الزيادة على السائق تتراوح ما بين 18 إلى 20 جنيهًا في اليوم، مضيفًا أن الزيادة التي يفرضها بعض السائقين على الركاب وتصل إلى 2 جنيه "مجحفة".

وخاطب الطايفي أهالي دمنهور قائلاً: "ما تدفعش أكتر من نص جنيه كده السواق هيعمل حوالي 50 جنيه في اليوم ويبقى غطى زيادة البنزين وكسب فوق مكسبه كمان".

إلى ذلك، لاقت الحملة قبولاً لدى عدد كبير من مواطني دمنهور، الذين أعلن عدد كبير منهم تضامنه معها.

وقالت رضوى نشأت - طالبة: "فعلاً لازم نحارب جشع بعض السواقين ، النهاردة ركبت تاكسي للموقف و السواق أخد 8 جنيه بعد ما كنت بادفع 5 جنيه، وانا يوميًا بأسافر كتير عليا ادفع 16 جنيه تاكسيات بس للموقف رايح جاي، غير المواصلات التانية".

وقالت منى الطلحاوي - موظفة: "النهاردة قدام عيني السواق نزل من التاكسي وكان هيمسك في خناق زبونة معاه علشان ما رضيتش تدفع غير 4 جنيه وهو كان عاوز 5 جنيهات".

وقال إبراهيم علي - عامل: "لازم يكون فيه مراعاة لظروف الناس ولو حكم الأمر الناس تقاطعهم وتركب السرافيس والنقل الداخلي لغاية ما يلتزموا ويعرفوا إن الله حق".

وقال عبد المعطي اللقاني - سائق تاكسي: "مش كل السواقين طماعين واحنا في كتير من الأوقات بنركب زباين بأقل من الأجرة لما بنلاقي حالتهم على قدهم، بس الزيادة إحنا مجبرين عليها. البنزين زاد وقطع الغيار والصيانة زادت خصوصًا مع زيادة سعر الدولار، ومع ذلك انا عن نفسي زودت جنيه واحد بس على المشوار وما اعتقدش انه كده كتير". ​