أسعار اللحوم البلدية "نار" في الأقصر.. ومواطنون: "هنتصور معاها فقط"

الأقصر – محمد محروس:

شهدت أسعار اللحوم البلدية ارتفاعا ملحوظا في محافظة الأقصر خلال الأيام الماضية حيث يتراوح سعر كيلو اللحوم البلدي حاليا في محلات الجزارة ما بين 100 و110 جنيه للكيلو.

وشكا مواطنون من عدم قدرتهم علي شراء اللحوم البلدية في ظل ارتفاع سعر الكيلو منها تزامنا مع ارتفاع أسعار كافة السلع الأساسية في ظل ثبات دخول الأسر المصرية.

أحمد إبراهيم – موظف – يقول :" انا اشتريت يوم الخميس اللي فات كيلو ونص لحمة بـ 150 جنيه اللحمة مرة واحدة سعرها زاد من 80 جنيه للكيلو لـ100 جنيه كفاية بقي نتفرج عليها ونتصور معاها عند الجزار" مضيفا " أنا مرتبي كله 1460 جنيه وبعول أسرة من 6 أفراد حد يقولي اكفيهم ازاي مع ارتفاع أسعار كل حاجة".

عبداللطيف سعد – مزارع – يقول :" احنا مش قادرين نشتري لحمة خلاص لما الكيلو الواحد بقي سعره 110 جنيه وأنا أسرتي 9 أفراد يعني عاوز 2 كيلو علي الأقل 210 جنيه منين أجيب تمنهم.. بلاها لحمة".

يضيف سعد :"إحنا كنا بناكل اللحمة 4 مرات في الشهر تحديدا كل خميس من كل أسبوع بطلت من فترة كبيرة اشتري لحمة وبقيت بشتري فراخ وسمك ولكن هما كمان أسعارهم بقت نار".

بينما يقول الطيب حسن – جزار – :" الناس بتحملنا احنا ارتفاع أسعار اللحمة مع أن احنا مالناش ذنب سعر راس الدبيحة الواحدة دلوقتي بيتراوح ما بين 15 ألف و25 ألف جنيه.

يضيف حسن :" احنا دلوقتي بنخسر مبقناش بنبيع زي الأول الناس بطلت تشتري واللي كان بيشتري 2 كيلو بقي يشتري كيلو بس واللي كان بيشتري كيلو بقي بيشتري نص كيلو احنا بنتمني ان اسعار اللحمة تنزل عشان نبيع أكتر".