بالفيديو.. أهالي جنوب سيناء للمحافظ: "نفسنا نشرب مية مصر"

جنوب سيناء - داليا منير:

"كلنا نعرف المحافظ".. هكذا أجمع أهالي جنوب سيناء نظرًا لكثرة جولات اللواء خالد فودة ولقاءاته باﻷهالي من بدو الوديان وسكان المدن.

عدسة "مصراوي" التقت بعض المواطنين من أماكن مختلفة، للحديث حول مشاكل المواطنين، فطالب كثيرون بالحصول على مياه شرب نقية، وناشد البعض الاهتمام بقطاع التعليم، فيما أبدى آخرون استياءهم حول مستشفيات المحافظة، فضلاً عن تقنين أراضي الدولة بالرويسات.

وديع فتحي، سائق، ناشد المحافظ قائلاً: "نفسنا نشرب مية مصر.. عايزين مية نظيفة لأن المياه المعدنية غالية والظروف تعبانة و مية مصر واصلة لقرب شرم الشيخ".

ووافقه الرأي "عم منصور" حارس لفيلا بحي النور: "المية اللي بتيجي في جراكن إحنا مش عارفين جاية منين.. والشوارع في حي النور مكسرة والدنيا غليت ومفيش دخل علشان نصرف منه".

عصام عادل، مواطن من شرم الشيخ قال: "أنا بشتغل في السياحة بشرم الشيخ من 20 سنة.. ومحتاجين حد يقولنا وضع السياحة ليه مش شغال، مع إن في شباب كتير عندهم خطط للنهوض بيها"..

وتابع مستغيثًا: "أنقذوا السياحة علشان بيوت الناس اللي شغالة في السياحة.. أنقذوا 3 مليون عامل".

مصطفي زيدان، وهو من أهالي الرويسات، قال: "أنا قاعد في شرم الشيخ من 12 سنة.. وبوجه رسالة للمحافظ: عملت إيه ﻷهالي الرويسات اللي أخذوا وعد بعدم اﻹزالة وبعدين حصلت اﻹزالة واتعمل للناس محاضر.. وأضاف زيدان: "لما اتناقشنا في موضوع الرويسات قالوا إنها أرض ملك للدولة".

وتساءل متعجبًا: "الناس دي كلها بنت على مرأى ومسمع من الجميع.. ولا المسئولين صحيوا لقوا الناس دي بانية وساكنة ؟".

ولفت زيدان إلى وجود عجز في المعلمين بالمدارس، ووجه حديثه للمحافظ قائلاً: "يا ريت تيجي تشوف المركز الطبي في الرويسات من غير دكاترة ولا يصلح للعلاج".

واتفق بعض المواطنين على مقولة: "كله بيعمل نفسه بيشتغل أدام المحافظ.. وأول ما بيمشي بيظهر الفساد تاني".. مشيرين إلى أن المحافظ يتفقد جميع مدن المحافظة، ولكن الصورة الحقيقية لا تصل له، مؤكدين وجود موظفين لا يقومون بعملهم على الوجه الأكمل.