فقدت 5 من عائلتها.. "خنساء الروضة": "كنا مسنودين على اللي راحوا"

الإسماعيلية - إنجي هيبة:

"خسرت 5 من عائلتي لن يعودوا، بيتي يبعد عن المسجد 7 كيلو، تلقيت اتصالا هاتفي من شقيقتي تصرخ وتكبر (يالله.. يالله)، توقعت تعرضهم لحادث وعايزاني أبعت الإسعاف".. بهذه الكلمات روت "أم عبدالله" السيدة الأربعينة كيف وصلها خبر الفاجعة التي قدر لها أن تفقد 5 من عائلتها في الهجوم الآثم علي مسجد الروضة بشمال سيناء، أثناء أداء صلاة الجمعة الماضي.

وأضافت: "جريت مسرعة نحو مدخل القرية وعرفت وأنا بجري إن فيه هجوم على المسجد، شوفت المصلين بقوا أموات".

تتابع: "ابن أختي رغم إصابته شاف أخوه بيموت، جره من جلبابه لخارج المسجد حاول ينقذه لكنه مات.. الحريم عيب عندنا تدخل الجامع أمه أخدته في حضنها وجيت مع المصاب إسماعيلية وسبتها في العريش مع اللي ماتوا، وإحنا في الطريق للإسماعيلية، اتسهلت كل حاجة التحويل للمستشفى العام وفتح كوبري السلام والمعديات، في تسهيلات بالمرور".

وسردت: "عمري ما شوفت زي الموقف دة عربيات الإسعاف بقت تفضي وترجع تعبي مصابين وقتلي تاني.. ادعولنا ربنا يصبرنا ويحمينا الحريم ما بتعرفش تتصرف كنا معتمدين على رجالتنا إحنا هنفضل صامدين وهنموت في أرضنا المكتوب مكتوب، ولآخر لحظة لن نترك الأرض.. الأرض عندنا يعني العرض واللي يفرض في عرضه ما يبقاش شريف".

ووجهت "خنساء الروضة" رسالة إلى الرئيس عبدالفتاح السيسي، مؤكدة دعم أهالي سيناء له، وطالبته بالحديث معهم دون وسطاء.

وقالت "أم عبد الله" والتي رافقت ابن شقيقتها للعلاج بمستشفى الإسماعيلية العام على مدار 4 أيام الماضية: "عايزين نتكلم معاك يا ريس من غير ما تدخل بينا حد، إحنا بنحبك وبنايدك، بس إحنا غلابة وغلابة قوي، ما بقاش لينا بعد الله غيرك، سيناء اتدمرت، ما بقاش فيها شغل لولادنا اللي فضلوا من الحادث في القرية، إحنا ولادك وعايشين تحت حمايتك، تعالى ياريس وشوف ناس جديدة، واسمعنا ونسمعك".