بعد تحويل سياراتهم من البنزين للغاز.. سائقو أجرة بالبحيرة: "بيوتنا اتخربت"

البحيرة – أحمد نصرة:

أثار قرار صادر من محافظة البحيرة، بتحويل جميع السيارات الأجرة من العمل بالبنزين إلى الغاز غضب العديد من سائقي المحافظة، وطالبوا بمراجعة هذا القرار لما يرون فيه من آثار سلبية عليهم وتضررهم منه، لا سيما وأنه جرى إقراره على سيارات محافظة البحيرة وحدها دون المحافظات الأخرى.

رامي عوض – سائق تاكسي قال: "وأنا بجدد ترخيص التاكسي في المرور.. مضوني على إقرار إني لازم أحول السيارة من بنزين لغاز قبل التجديد القادم، فمضيت وأنا مش مقتنع بس كنت مجبر على كده وإلا مش هيجددولي".

وأبدى حسن الكومي، سائق سرفيس، غضبه من القرار قائلا: "فيه سيارات لا تصلح للغاز خاصة السرافيس السوزوكي، حيث إن سعة الموتور 970 سي سي وده يخليه لو اتحول لغاز يحتاج عَمرة كل سنة بدل 3 سنوات، والعمرة بتتكلف حوالي 5 آلاف جنيه، يبقى اللي بنوفره من البنزين هنحط فوقه فلوس علشان نعمر السيارة".

وأعرب أحمد حمودة، سائق سرفيس، عن اندهاشه من القرار وقال: "كل اللي بيسمع القرار ده بيستغرب وبيقول غير قانوني، مفيش في القانون حاجة تجبر أصحاب السيارات على تحويل سياراتهم إلى غاز، ولو هو قانوني ليه القرار في محافظة البحيرة بس".

"مفيش في دمنهور غير محطتين بس للغاز.. وده مش هيستوعب الكم من السيارات التاكسي والسرفيس، يعني مطلوب مننا نقف 3 أو 4 ساعات علشان نفول".. قالها نبيل حمدان، سائق سرفيس.

واتفق معه محمود حسين، سائق تاكسي وتابع: "لو اطبق القرار ده هبيع التاكسي من تاني يوم وأجيب ملاكي أشتغل عليها وأريح دماغي.. ولا ضرايب ولا تراخيص ولا مؤسسة ولا غيره"..

وتساءل: حسين: "هما ليه مش عاوزينا نشتغل مظبوط؟ وبيصعبوا الأمور علينا وبيجبرونا نشتغل غير قانوني؟".

من جانبه، أكد العميد محمد القاضي، مدير إدارة المرور بالبحيرة، في تصريحات لـ"مصراوي"، أن إدارة المرور بدأت بالفعل في تنفيذ القرار الصادر من محافظة البحيرة، ويشترط عند تجديد ترخيص أن تكون السيارة تعمل بالغاز، وفي حالة عدم توافر هذا الشرط يتم منح السيارة مهلة شهر لتحويلها".

وأضاف القاضي، أن هذا القرار يحقق العديد من المنافع، سواء للدولة من خلال تقليل الاستهلاك للبنزين المدعم، أو للسائق نظرًا لرخص سعر الغاز مقارنة بالبنزين، هذا بخلاف الفوائد البيئية والحد من التلوث.

وأشار مدير إدارة المرور، إلى أن عدد محطات الغاز حتى الآن كاف ومناسب ولا توجد مشكلة أو تكدس على الإطلاق، نظرًا لأن عملية التحويل تجري بشكل تدريجي وليست دفعة واحدة، ومن المؤكد ازدياد عدد المحطات بزيادة أعداد السيارات التي تعمل بالغاز".