بعد 66 يوم على اختفائها.. شبح المجهول يطارد "العمدة ناهد".. "صور"

الشرقية – فاطمة الديب:

66 يومًا تغيبتها "العمدة ناهد لاشين" عن منزلها بقرية حانوت، وسط تردد شائعات عدة بشأن حقيقة هذا الغياب، لذا انتلقت عدسة "مصراوي" إلى قرية "حانوت"، حيث يقبع منزل "العمدة ناهد"؛ لرصد أسباب وتداعيات الاختفاء غير المبرر والمحاط بالشائعات.

"أختي ماتت.. مش معقول تسيب بيتها وعيالها الفترة دي كلها من غير سؤال، ناهد عقلها يوزن بلد".. هكذا أكد إبراهيم عبد الحميد لاشين، صاحب شركة استيراد وتصدير، وشقيق "العُمدة ناهد"، في تصريح لـ"مصراوي"، مضيفًا: "شقيقتي توفيت.. أكيد اللي ورا الموضوع منظمة كبيرة عارفة هي بتعمل إيه".

واستطرد: "من وقت غياب ناهد وإحنا بنتابع مع مديرية الأمن، ومفيش أي معلومات جديدة وصلنا لها ولا هما وصلوا لها.. دا حتى البلاغات اللي بتييجي بالاشتباه في العثور عليها بتيجي من الأهالي.. يا ريت الأمن يشد حيله شوية ويعرف يوصل لأي خط يعرفنا أختي راحت فين".

وأضاف: "سمعنا ناس كتير بتقول إن اللي ورا غيابها خلاف مع جوزها.. جوز ناهد يبقى إبن عمي، يعني من عيلة واحدة، ولو مشينا ورا الشائعات والكلام اللي بيتقال هنقتل بعض.. اللي عمل كده مش حد صغير، حساب أختي اتحذف من على فيس بوك والأمن مش عارف يتتبع تليفونها".

وأردف صلاح لاشين، شقيق العمدة ناهد: "ملناش عداوات مع حد علشان ناهد تتخطف.. أختي الكل كان بيحبها ويحترمها، ومن وقت ما فارقتنا وإحنا في عذاب"؛ موضحًا أن شقيقته تغيبت عن المنزل منذ عصر يوم 12 مارس الماضي، بعد توجهها لمستشفى كفر صقر العام.

وتابع: "لفينا عليها كل القرى والمراكز والمستشفيات اللي حوالينا ومعرفناش نوصل لها.. من وقت غيابها وإحنا يوماتي يجيلنا أخبار كذب.. آخرها إمبارح حد اتصل بينا وقال لنا إنهم لقوا جثتها في قرية الملكيين البحرية جنبنا في الحسينية".

واختتم "صلاح" حديثه: "خدت شباب العيلة في 5 عربيات وروحنا على هناك نجري، وفي الآخر طلع البلاغ كذب وإنها مش جثة أختي"؛ وقال: "نفسي أشوفها ولو مرة واحدة قبل ما أموت.. أختي كانت حنية الدنيا فيها وبعدها حالنا عدم".

كان اللواء رضا طبلية، مدير أمن الشرقية، قد تلقى إخطارًا من اللواء هشام خطاب، مدير المباحث الجنائية، ببلاغ من "محمد علي" زوج "ناهد عبدالحميد مصطفى إسماعيل لاشين" وشهرتها "ناهد لاشين" 39 عامًا، من قرية "حانوت" التابعة لدائرة مركز كفر صقر، بتغيبها عن المنزل منذ أكثر من شهر، وهو ما حُرر به المحضر رقم 2541 إداري كفر صقر لسنة 2017.