المُدرسة المعتدى عليها من زميلها بالشرقية: "ضربني بالجزمة وخاض في عرضي"

الشرقية – فاطمة الديب:

"الشيخ أبو دقن اللي يعرف ربنا خاض في عرضي وقاللي يا بتاعة حفنا".. بهذه الكلمات بدأت "ريهام.م" أخصائية اجتماعية، تروي تفاصيل تعدي زميلها بمدرسة "أنشاص الرمل" الابتدائية، عليها داخل حرم المدرسة التابعة لإدارة بلبيس التعليمية.

وأضافت ريهام لـ"مصراوي"، أنها لم تكن تتوقع أن تسمع مثل تلك الألفاظ من زميلها المفترض به أنه "شيخ يعرف ربنا"، خاصةً محاولته الخوض في عرضها: "بيقولي أنا عارف تاريخك كله، وشتمني بألفاظ لساني ميقدرش يقولها قصاد اللي في المدرسة كلهم وشوه صورتي".

وأوضحت ريهام أنها من قرية "حفنا" التابعة لمركز بلبيس، إلا أنها حاليًا متزوجة وتعيش في قرية "أنشاص الرمل" وتعمل بمدرسة القرية: "بقالي في المدرسة 14 سنة ومحدش فيهم سمع صوتي ولا عملت مشكلة مع أي حد والكل يشهد".

وشددت على أن تهديدات زميلها كانت للجميع حتى من قبل شهور مضت: "عامل نفسه مجنون وكل شوية يهددنا ويقول إن معاه شهادة معاملة أطفال، وحتى التلاميذ اللي في المدرسة كرهوهها عشانه وبقوا بيخافوا منه ومن كلامه".

وعن تفاصيل الواقعة، قالت ريهام، إنها كانت ذاهبة إلى المدرسة كعادتها إلا أن زميلها اعترض طريقها على غير عادته وأغلق باب المدرسة في وجهها: "قاللي مش هتدخلي وفضل يشتمني بألفاظ وحشة، وبعدها قلع جزمته وضربني بيها".

وأشارت ريهام، إلى أنها لم تكن أبدًا تبحث عن إثارة المشكلات، خاصةً وأنها أم لخمسة أبناء، أكبرهم في المرحلة الثانوية، لافتةً إلى أن المشكلة أثرت على عائلتها: "عيالي نفسيتهم تعبانة من وقت اللي حصل، ومحدش مقدر اللي إحنا فيه، وفي الآخر عاوزين ينقلوني أنا من مكاني.. يروحوا يحاسبوا الشيخ اللي قالها لي صريحة قصاد الناس إنه هيوري الحريم أيام سودة علشان شهدوا معايا".