دخله الشهري 700 جنيه.. بائع جرائد يعثر على 50 ألف جنيه ويعيدها لصاحبها (صور)

البحيرة – أحمد نصرة:

كرم اللواء هشام آمنة، محافظ البحيرة، اليوم الخميس، محمود نصر عبدالمولى، بائع جرائد بمدينة أبوحمص، تقديرا لأمانته، حيث عثر على مبلغ 50 ألف جنيها بجوار الكشك الذي يعمل به ولم يتردد في ردها لصاحبها الموظف بالإدارة التعليمية، والذي كان يحوزها ضمن عهدته.

وقرر المحافظ صرف مكافأة 3 آلاف جنيه وتوفير فرصة عمل لبائع الجرائد بمكتبه ووجه له تحية شكر وتقدير على أمانته رغم ظروفه الصعبة، مؤكدًا أنه نموذج يحتذي به.

وكشف محمود 33 سنة، لـ"مصراوي" تفاصيل العثور على المبلغ قائلا: "كان الوقت الصبح ولقيت الكيس جنب الكشك وكنت مفكر فيه زبالة، جيت شايله وعايز أرميه لقيته تقيل ببص فيه لقيت الفلوس".

ويكمل محمود: "الفلوس كان معاها كارنيه وأوراق، لقيتها تخص موظف أعرفه في التربية والتعليم، جريت على الإدارة وأديته الفلوس مكانش مصدق ساعتها إنها رجعتله، وقاللي إنها عهدة ومكانش عارف يتصرف إزاي".

ويستطرد محمود: "رغم حاجتي للفلوس وظروفي الصعبة مفكرتش لحظة إني أمد إيدي على جنيه واحد منها، وربنا يغنينا بحلاله، أنا شغال في الكشك ده وأجري الشهري 700 جنيه بس بصرف بيها على أسرتي، وعندي طفلين آدم 4 سنين، وندى سنة وشهرين، وكل أملي الحصول على فرصة عمل كريمة أعيش بيها أنا وأولادي".