"التوأم المريض".. 420 ألف جنيه تنقذ "محمد" و"إسلام" من الفشل الكلوي بالشرقية (صور)

الشرقية – فاطمة الديب:

"لو أقدر أبيع نفسي علشانهم مش هتأخر".. بهذه الكلمات بدأ "عويضة أبو غالي" مدرس إداري، مُقيم بقرية "المتاجاة الكبرى" التابعة لمركز كفر صقر بمحافظة الشرقية، روايته لـ"مصراوي" عن مأساة طفليه مع المرض؛ بعدما ابتلاهما الله بالفشل الكلوي وباتوا في أمس الحاجة لزراعة الكلى.

"بقالنا 3 سنين في الهم وعمري ما فقدت الأمل بربنا سبحانه وتعالى ودايمًا كنت بقول ربنا أكيد هيشفيهم، والله بعت كل اللي حيلتي علشانهم لكن المرض اتمكن منهم ومبقاش فيه حل غير زراعة الكلى"؛ يضيف الأب: "الدكاترة قالوا لي إن حالة ولادي اتأخرت ع الآخر ومبقاش قدامنا غير عملية لكل واحد بـ210 ألف جنيه وأنا مش بإيدي حاجة غير مد الإيد".

وأشار الأب المكلوم، إلى أن إصابة طفلية "إسلام" و"محمد" ليست الأولى بين أطفاله؛ إذ سبقتهما شقيقتهما الكبرى، والتي توفيت على سرير جهاز الغسيل الكلوي: "ربنا ابتلاني في ولادي الثلاثة وراضي والحمد لله، بنتي الكبيرة ماتت قصاد عيني وهي بتغسل كلى في الزقازيق واحتسبتها عند ربنا".

وتابع: "مصيبتي في إسلام ومحمد إن حملهم كبير وكل مرة بنروح نغسل فيها يا دوب الفلوس بتكفي مصاريف المواصلات والسفر.. مبقاش عندي أي حاجة أقدر أقدمها لهم غير طلب المساعدة من الناس وأكيد ربنا مش هيخذلهم وهيبعت لهم اللي يقف معاهم ويعدوا المحنة دي ويعيشوا سنهما".

وبعث "عويضة" عبر "مصراوي" برسالة إلى أصحاب القلوب الرحيمة، قائلًا: "لكل اللي صعبان عليه حال ولادي يا ريت يساعدهم ولو حتى بالدعاء.. ولادي بيضيعوا مني وأمنية حياتي ربنا يرزقهم ويعملوا العملية ويعيشوا وميحصلوش أختهم".