"الأطفال عملوه زحليقة".. كوبري مشاة أعلى ترعة ينذر بكارثة في البحيرة

البحيرة – أحمد نصرة:

تعرض كوبري المشاة الحديدي الذي يقطع ترعة الخندق أمام مسجد عمرو بن العاص بمدينة دمنهور، بمحافظة البحيرة، للانفصال عن موضعه، وتصاعدت شكاوى المواطنين مطالبين بإصلاحه لما يشكله من خطورة على أرواحهم وأرواح أبنائهم، ولما يمثله من أهمية لديهم كوسيلة للعبور نحو الجانب الآخر من المجرى المائي.

يقول إبراهيم المقطف: "الكوبري بقاله فترة مفصول عن مكانه واتحرك عن موضعه ومفيش حد حاول يصلحه والناس بتعدي منه والأطفال واخدينه لعبة، رجاء من المسؤولين عن الوحدة المحلية الاهتمام بإصلاحه".

ويوضح محمد السعيد: "الكوبري في مكان حيوي وعدد كبير من المواطنين يستخدمونه بخلاف المئات من طلاب مدرسة الزراعة بما يشكل خطورة وتهديدًا كبيرًا على الأرواح".

وتحذر نادية إحسان "كل ما بعدي من جنب المكان بلاقي أطفال بتلعب وتتنطط على الكوبري وعاملينه زحليقة بعد ما رفعوا مقدمته، الأطفال دول ممكن أي حد فيهم يقع بسهولة في المياه ياريت المسؤولين يتحركوا سريعا"

"أقرب كوبري يبعد عن المكان بمسافة كبيرة والناس مضطرة تستخدمه علشان تعدي الناحية التانية، ياريت يصلحوه بسرعة، هما مستنيين يعني الكارثة تحصل الأول، من كام يوم عامود نور وقع على طالب في كلية الشريعة ومات، وأدينا بنحذر من كارثة تانية ممكن تحصل" بغضب تحدث إسماعيل الرومي.

وقال أحمد فرغلي، نائب رئيس الوحدة المحلية لمركز ومدينة دمنهور: "الكوبري تعرض للانفصال بسبب التغير في منسوب المياه، وهو حاليا مغلق وغير مصرح باستخدامه من قبل المواطنين الذين يصرون على الوصول إليه قفزًا واستخدامه، وجرى عمل مقايسة للإصلاح وسيبدأ العمل به قريبا جدا".