مأساة ماجيسكو تتكرر بإدكو.. "حسام" ابتلعه شاطئ الموت وجثته غائبة - صور

البحيرة – أحمد نصرة:

مع اقتراب ورديته بمصنع الملابس من الانتهاء، كان الإرهاق قد نال من حسام، وساعد الطقس شديد الحرارة في هذا اليوم من ضيقه وإحساسه بالملل، فكان قراره بالذهاب إلى الشاطئ فور خروجه من عمله.

ما أن وصل "حسام" إلى المنزل حتى التقط ملابس السباحة واتجه كعادته نحو شاطئ إدكو الذي لايبعد سوى أمتارًا قليلة عن منزله المواجه للساحل، ولكن أراد القدر أن تكون هذه المرة مختلفة بعد أن جرفه التيار، ولازالت جثته غائبة منذ 3 أيام لتذكرنا بمأساة الشاب محمد حسن الشهير بماجيسكو والتي دارت أحداثها بشاطئ ستانلي.

يقول محمد توتو، ابن عم الغريق:" حسام نزل البحر عصر الإثنين، المياه جرفته ناحية الصخور بمنطقة المرسى، من ساعتها الجثة ما طلعتش ومش عارفين نلاقيها".

ويضيف توتو:"جيراننا كلهم صيادين نزلوا بمراكبهم ومن يومها بندور على الجثة مش لاقيينها، عملنا كل حاجة صلينا صلاة الغائب على الشط، وجبنا أمه تنادي عليه قدام البحر حسب المعتقدات ومفيش فايدة".

وقال شعبان الصافي - أحد جيران حسام: "حسام شاب مكافح، عمره 15 سنة طالب في ٣ إعدادي وفي إجازة الصيف بيشتغل في مصنع ملابس عشان يجيب مصاريفه، لأن والده راجل بسيط وعلى قد حاله وشغال باليومية".

ويضيف شعبان:"على مدار 3 أيام بندور بندور على جثة حسام بدون نتيجة، خاطبنا المحافظة ومحدش استجاب، الصيادين اتطوعوا ونزلوا بمراكبهم، وفيه غطاس جه متطوع من اسكندرية، ولسه النهاردة الصبح أول يوم ييجي فريق غطاسين مدرب".

"هذه المأساة دائمة التكرار، بحر ادكو مش للعوم، بحرنا ورماله غير ثابتة، وكله دوامات وحفر من شركات البترول والصيادين، ياريت نفهم بقا وكفايانا موت لحد كده لازم الأهالي تمنع ولادها وتوعيهم وتفهمهم إنه مكان خطر" تحذر فاطمة الديباني – من أهالي إدكو.

ويتساءل علاء خميس – أحد أهالي إدكو مندهشًا: "الناس إللي بتقول اقفلوا الشواطئ، هو باب شقة هيتقفل؟!، ده بحر مفتوح، فهموا ولادكم وانصحوهم ميروحوش، بس فكرة إن لحد الآن الجثة مطلعتش هي دي المحزنة واللي فعلا تستاهل تتكلموا فيها، لازم يكون موجود وحدة إنقاذ وغواصين ثابتين، لو كان فيه غواصين مكنتوش احترتوا الحيرة دي".

وقالت فاطمة كمال من أهالي إدكو:"بقيت خايفة وحاسة في المكان ده بريحة الموت، البحر إللى ربنا وهبه لينا نعمة بقى نقمة بعد ما اتكررت حالات الغرق فيه.. رغم إنه بيجيله ناس من المحافظات، أهملوه وبدل ما يبقى مصيف محترم يفتح أبواب رزق للناس بقى بحر الموت وشطه بقى مكان للصلاة على الغريق الغائب".

كانت محافظة الإسكندرية شهدت واقعة مشابهة لغرق شاب على شاطئ ستانلي يدعى "ماجيسكو" في يناير من العام الماضي 2018، وعثر على جثته وسط الصخور بعد 7 أيام من فقدانه.

اقرأ أيضًا:

نبوءة "ماجيسكو" المرعبة.. كيف تحققت على كوبري ستانلي؟ (صور)

بالصور- لحظة انتشال جثة "غريق ستانلي".. ومصدر أمني يفجر مفاجأة