"كورونا لا يرتاح في النهار".. أهالي بالبحيرة غاضبون من تحايل قاعات المناسبات

البحيرة - أحمد نصرة:

لجأ عدد من قاعات المناسبات بمحافظة البحيرة، إلى التحايل على قرار مجلس الوزراء بحظر التجمعات، من خلال إقامة حفلات الزفاف نهارًا، وسط مطالبات من الأهالي بتشديد الرقابة نهارًا وليس في المساء فقط.

"مصراوي" رصد رد فعل الأهالي على الواقعة، ورؤيتهم للتحايل على الإجراءات المتبعة للوقاية من فيروس كورونا المستجد.

يقول السيد الزواوي أحمد الاهالي: إن القاعات تعتمد على أن حملات الرقابة تخرج في الليل فقط، متابعًا "بقوا يعملوا الأفراح وقت العصر من ٣ لحد ٧ بالليل، الطمع عملهم ومش قادرين يصبروا أسبوعين وخايفين على مكاسبهم، مع إن فيه ناس غلابة رزقها اليوم بيومه، صابرة وملتزمة".

"اللي بيحصل مهزلة، الدولة لما لغت التجمعات أكيد مكانش قصدها تلغيها بالليل بس، لأن الفيروس مش لا يرتاح في النهار وممكن ينتقل برضه، هو الناس دي بتفكر إزاي".. بغضب تحدث محمد عبد الجليل.

ويفسر عادل رمزي قبول البعض بإقامة أفراحهم نهارًا خلافًا لعادات الشعب المصري: "الناس بتضطر تعمل الأفراح بالنهار عشان القاعات رفضت تردلهم الحجوزات بتاعتهم، فبدل ما تضيع عليهم فلوسهم بيقبلوا بالأمر الواقع، لازم المسؤولين يتدخلوا ويلزموا القاعات دي برد الحجوزات بتاعة الأفراح وتتوقف الحفلات تمامًا في الوقت الحالي".

وتناشد أماني عرفة المواطنين: "مطلوب الناس يكون عندها وعي شوية يعني أصحاب الفرح مش هيجرى حاجة لو أجلوه شهر ولا اتنين، والناس إللي بتتعزم لازم يخافوا على نفسهم وأسرهم ومايروحوش حتى لو كان فرح أقرب الأقربين ليهم".

الرقابة مش لازم تقتصر على القاعات بس، لازم محلات الفراشة كمان، لأن فيه ناس وخصوصًا في الريف بيعملوا الأفراح في الشارع".. ينبه رضوان عبدالعال إلى إقامة بعض الأفراح بالشوارع.