فن للبيع.. "نور" ترسم لوحاتها وتبيعها في الشارع بسبب "كورونا" (صور)

الشرقية – فاطمة الديب:

"نور محمد" فتاة في العشرين من عمرها، طالبة بالفرقة الأولى بكلية التربية الفنية جامعة عين شمس، عشقت الرسم منذ نعومة أظافرها؛ كانت تُقلد الأشكال وتسعى لإبراز موهبتها حتى أتقنت الرسم وباتت ترسم لوحات "عميقة" وأنواع مختلفة من الرسم، لكن جاءت أزمة انتشار فيروس "كورونا" لتغير من خططها وتدفعها للجلوس في الشارع تعرض لوحاتها وتبحث عن مشتري في ظل الأزمة.

"مجالي وبحبه ونفسي أكون نفسي، مش شبه حد".. قالتها نور لـ"مصراوي" بنبرة تؤكد ثقتها في موهبتها وفنها، وأن مجال دراستها كان بعيدًا عن الفن والرسم: "كنت طالبة في مدرسة ثانوية فنية بنظام 5 سنوات، وكان نفسي أدخل كلية هندسة لكن مجموعي فرق حاجات بسيطة بعد ما جبت 93%".

وأضافت: "الرسم بالنسبة لي موهبة ومجال ألاقي فيه نفسي وبحبه ونفسي أحقق فيه ذاتي"، موضحةً أنها سبق وكانت بمثابة المُدرسة للرسم في العديد من الأماكن: "اشتغلت في أمكان كتير وكنت بأدي كورسات وفي حضانات ومدارس تعليم رسم، ومع الوقت موهبتي بتطور يوم عن يوم".

وعن بداية موهبتها، أشارت نور إلى أنها منذ طفولتها كانت تهوى الرسم: "كنت بقلد أي رسومات أشوفها، ولما كبرت بقيت أدخل على النت وأشوف فيديوهات على اليوتيوب وعلمت نفسي بنفسي وطورت موهبتي لغاية ما بقيت قادرة أرسم لوحات وتماثيل ونحت كمان".

وعن فكرة عرض لوحاتها بالشارع، تقول نور: "أزمة كورونا فرقت في حاجات كتير والدراسة كمان اتأثرت، وحاليًا أنا بأنزل الشارع لساعات قليلة علشان أعرض لوحاتي وأبيعها، وفي ناس بيعجبها الرسم والفن عمومًا، وممكن أرسم أشخاص أو أبيع لوحات من لوحاتي، وأسعارها بتتراوح من 60 جنيه لـ200 جنيه، حسب الألوان والبرواز".

وأردفت: "قبل ما أنزل وأعرض لوحاتي في الشارع لقيت اثنين زمايلي بيرسموا في الشارع وعجبتني الفكرة أوي، وقولت أجرب إني أرسم في الشارع، لكن لقيت إن الرسم هيبقى صعب علشان أدوات الرسم والجو العام ممكن اللوحات تطلع مش مظبوطة، فبقيت أرسم لوحات وأعرضها في الشارع للبيع، أو أجيبها وأكملها في الشارع لما يبقى ناقص فيها حاجات بسيطة، وعادة اللوحة بتاخد وقت من ساعة لساعتين".

وتتنوع لوحات "نور" ما بين عدة فنون، لكن ما يستهويها بحسب وصفها هو الفن العميق: "أغلب رسوماتي بتبقى معبرة عن حالات سواء حزن أو استياء، وبحاول دايمًا يبقى فيها عمق، وكتير أرسم بورتريهات، قبل أن تضيف: "عاوزة يبقى ليا شغل وأحقق فيه ذاتي وفي المستقبل نفسي أفتح معرض أعرض فيه لوحاتي".