"لو عندك بنطلون قديم مترميهوش".. لمسات "أم أحمد" تحول الجينز حقائب رائعة (فيديو)

البحيرة - أحمد نصرة:

بوصولها لسن التقاعد وانتهائها من مسيرتها الوظيفية في مديرية أوقاف البحيرة، لم تطق الحاجة أم أحمد الجلوس في المنزل دون عمل، وبدأت رحلة البحث عن فكرة لمشروع تشغل به وقت فراغها ويدر عليها دخلًا.

وجدت أم أحمد ضالتها في مشروع لإعادة تدوير أقمشة الجينز، وتصنيع حقائب ومشغولات منها، وهو المشروع الذي لاقى إقبالًا بين أهالي مدينة دمنهور، نظرًا لجودة المنتجات التي تصنعها، وانخفاض الأجر الذي تتقاضاه مقابل ذلك.

"لو حد عنده بنطلون جينز قديم أو مقطوع، بدل ما بيرميه بيجيبه لي وبعملهوله شنطة أو أي حاجة تانية تنفع" أوضحت أم أحمد طبيعة عملها المعتمد على إعادة تدوير الجينز.

تضيف أم أحمد: " لما بستلم بنطلون بأحدد المنتج إللي ممكن يطلع منه، بناء على شكل البنطلون ولونه وحجمه، كل حاجة وليها التصميم المناسب ليها سواء شنطة مدرسة أو رحلات أو غيرها".

تحدد تكلفة تحويل البنطلون إلى حقيبة: " باخد في القطعة 70 جنيه شاملة أجرتي والاكسسوارات والبطانة إللي بتضاف للشنطة، وفي كل الأحوال الزبون بيبقى كسبان أقل شنطة لو هيشتريها دلوقتي بـ 200 أو 300 جنيه".

وعن خططها لتطوير مشروعها تقول أم أحمد: " دايمًا بحاول أطور المشروع من خلال الإضافات والتعديلات المستمرة إللي بدخلها على التصميمات لإرضاء الأذواق ومواكبة السوق والموضة، وشغلي دلوقتي بالتأكيد بقى مختلف كتير عن أول ما بدأت".