"انتوا السبب وكنت محتاج ترميم".. رسالة شاب قبل إنهاء حياته في سوهاج

سوهاج - عمار عبد الواحد:
"أنا آسف إني مكنتش الشخص اللي بتتمنوا تشوفوه، آسف إني مقدرتش أبقى أعظم حد في الأرض علشان تفتخروا بي، آسف إني عمري ما قولت لحد فيكو إني بحبه في وشه وأنا كنت في أمس الحاجة إني أقول ده، بس مش أنا السبب في إني أكون بعيد، إحساسي إنكم مش عايزين تسمعوني ولا تفهموني هو اللي خلاني أبعد كل يوم عنكم، لحد ما قررت أبعد خالص".. بهذه العبارات بدأ الشاب "أسامة" رسالته التي كتبها على "فيسبوك" قبل انتحاره شنقًا، اليوم الأحد، بمسكن أسرته مدينة طهطا شمالي محافظة سوهاج.
وتابع الشاب الذي يعمل فني تركيبات كهربائية في رسالته التي عنونها ب"رسالة منتحر": "أنتِ عارفه إن عمري ما قولتلك إني بحبك؟!، خوفت أقولك تتريقي عليا ذي ما بكلمك في أي حاجه جد، عارف إني عمري ما حضنتك؟!خايف تقولي عايز كام، مش هتصدق لو قولتلك إني بس عايز حضن، فهمكم الغلط ليا كان أكبر دافع علشان أبعد،
مكنتش عايز فلوس ومش عايز عربيات ومش عايز أي حاجة".
وتابع في رسالته "أنا بس كنت عايز أحس الحب وأشوف إنك موجود وفاهمني، أنت عارف إن عمرك ما سمعتني؟، بس المرة دي بقى اسمعني على الأقل أنت متأكد إني مش عايز فلوس علشان عايز كفن جديد اتعايق بيه على الميتين جمبي، فمعلش حاول تسمع حاول تفهم كلامي ومن غير ما تتعصب في بداية الكلام وتزعق وتقفل الموضوع، أنا دايمًا كنت بحاول أفهمك إني محتاج حد يبقى في ضهري مش حد نظراته تكسرني".
"أنت لو كنت قربت لحظة كنت حسيت إني متكسر من جوا وأنت شايفني أفشل واحد في العالم، كنت هتفهم إني محتاج ترميم مش زيادة تكسير، كان ممكن ترممني بنظرة بدل نظرتكم ليا إني فاشل، نظرة مفرقتش عنيكم خلال الـ26 عامًا اللي عشتهم، أنت عارف إني مثلت علشان أهرب منكم؟، علشان لما أهرب لأوضتي ذي كل يوم أعيط واتكسر وحد يسألني أقوله دور جديد؟، أنت عارف بقى إني كنت عايش معاكم برا كل يوم بدور جديد؟، عارف بقى حقيقتي أنا أيه؟ اللي حاسس بيه!!!، كل ده كان محبوس جوا الأوضة، والفاصل بيني وبينكم مش باب الأوضة لا الموضوع مش سطحي كده، الفاصل كان كلامكم، نظراتكم، وعدم إحساسكم بي".

"كل مرة بتسيب حجر وحجر ورا حجر عمل سور والسور اتقفل، بقى أوضة وأنتم لسه مش حاسين بحاجة، وبالمناسبة دي مش أول محاولة للانتحار، حتى الانتحار فشلت فيه، بس ده فشلت فيه علشان مش عايز أوجعكم، مش عايز أضايقكم، كل مرة بقول في حاجة هتتغير، في حب هيظهر في حد هيحس بالتغيير الحاصل في ملامحي من كتر الزعل، بس للأسف مفيش جديد، فارجع تاني وأحاول انتحر وأقول بكرا، يجيي بكرا بس مكنش بيجي الحب، طلع مفيش حب أصلا علشان يجي".
واختتم الشاب رسالته التي تركها لمتابعيه على فيس بوك: "بس خلاص هيجي بكرا من غيري، هشيل حملي من علي قلوبكم، هوفر مكان على السفرة، هسيب أوضة فاضية للكراكيب، أنا ماشي ومسامح ومش شايل من حد فيكم، مش معقول هاجي أزعل منكم دلوقتي يعني، أتمنى ألاقي الحب بعد الموت ولو بدعوة كل سنة، أنا آسف طولت عليكم، بس معلش بقى ده كلام متحوش من سنيين، افتكروا دايمًا إنكم اللي دفعتوني للخطوة دي، أنتم مرحمتونيش وأنا عايش، بس أكيد ربنا هيرحمني لما أموت، مش جاهز أققبلك أنا عارف، بس متأكد إنك أرحم وأحن منهم وهتسامحني".

وتلقى مدير أمن سوهاج، اللواء محمد شرباش إخطارًا من قسم شرطة طهطا بانتحار شخص دائرة القسم.

بالانتقال والفحص، تبين العثور على المدعو "حمادة. أ" 26 عامًا كهربائي ويقيم دائرة قسم شرطة طهطا يرتدي كامل ملابسه، جثة هامدة، مسجاة على الأرض بمسكن أسرته، وبمناظرتها تبين وجود آثار خنق حول الرقبة.

وأفاد والده باكتشافه وزوجته انتحار نجله المذكور عن طريق شنق نفسه بحبل في سقف حجرته؛ بسبب الخلافات الأسرية، ونفى الشبهة الجنائية، وكلفت إدارة البحث الجنائي بالتحري حول الواقعة وظروفها وملابساتها. جرى نقل الجثة لمشرحة المستشفى، وباشرت النيابة العامة التحقيقات.
وتعمل الدولة على تقديم الدعم للمرضى النفسيين من خلال أكثر من جهة خط ساخن لمساعدة من لديهم مشاكل نفسية أو رغبة في الانتحار، أبرزها الخط الساخن للأمانة العامة للصحة النفسية، بوزارة الصحة والسكان، لتلقي الاستفسارات النفسية والدعم النفسي، ومساندة الراغبين في الانتحار، من خلال رقم 08008880700، 0220816831، طول اليوم، كما خصص المجلس القومي للصحة النفسية خط ساخن لتلقي الاستفسارات النفسية 20818102.
وأكدت دار الإفتاء المصرية، أن الانتحار كبيرة من الكبائر وجريمة في حق النفس والشرع، والمنتحر ليس بكافر، ولا ينبغي التقليل من ذنب هذا الجرم وكذلك عدم إيجاد مبررات وخلق حالة من التعاطف مع هذا الأمر، وإنما التعامل معه على أنه مرض نفسي يمكن علاجه من خلال المتخصصين.

اقرأ أيضًا:
شنق نفسه بحبل.. كهربائي ينهي حياته داخل مسكن أسرته في سوهاج