(أغلب زبائنه معاشات.. حكاية "الكابتن أنور" مع حفر الأختام النحاسية في البحيرة - (صور-فيديو

البحيرة - أحمد نصرة:

في سوق البندر، أقدم أسواق مدينة دمنهور، بمحافظة البحيرة، يجلس الكابتن أنور موسى، مدرس تربية رياضية بالمعاش يمارس مهنته التي تعلمها كهواية قبل أن يحترفها ويتفرغ لها عقب تقاعده من وظيفته الحكومية.

ممسكًا بقلم من الصلب يبدأ أنور في حفر إسم مدون ببطاقة موضوعة أمامه، على خاتم دائري من النحاس، وفي دقائق معدودة ينتهي من مهمته، ليغمسه بعدها في الحبر ويختبره بالطباعة على ورقة بيضاء صغيرة.

في البداية يقول الكابتن أنور: "اخدت المهنة بالممارسة كنت بشوف الختامين قاعدين فى السوق كنت بقعد جنبهم وأشوفهم بيعمل إيه وأقلدهم لغاية لما أتقنتها".

يضيف أنور: "الحفر على النحاس عملية مش سهلة، محتاجة قوة يدوية وصبر، ومهارة عشان يكتب الإسم بخط حلو في المساحة الصغيرة دي والأسماء تتقري كويس".

يوضح: "إللي عاوز الختم بيجيلي بالبطاقة الشخصية، وبحفره بنفس الإسم الموجود فيها بالظبط وبحط معاه التاريخ الهجري، وفايدته إن الختم لو ضاع فالجديد يلغي القديم".

ويكمل: "الأدوات اللي بستعملها بسيطة جدًا عبارة عن مبرد حدادي، وملزمة بيتثبت فيها الختم كويس، وقلم صلب بحفر بيه، وحفر الاسم بيكون بالمقلوب عشان لما ينطبع على الورقة يطلع عدل".

وعن زبائنه المتعاملين معه يقول: "أغلب زبايني من الأميين إللي مش بيعرفوا يكتبوا أو من أصحاب المعاشات إللي أيديهم بتترعش ومش بيعرفوا يمضوا، علشان يقبضوا لازم يبصموا وجنب البصمة الختم بتاعهم".

ويضيف: "الأختام بتستخدم كمان في أحراز الشمع الأحمر في القضايا المختلفة والضباط والمفتشين أصحاب الضبطيات القضائية بيحتاجوها".

ويحدد أنور أسعار الأختام: "سعر الختم بيبدأ من 10 جنيهات إلى 30 جنيها حسب الخامات المستخدمة، ومش بدق كتير مع الناس اللي حالتهم صعبة وأي حد عاوز ختم وظروفه صعبة اعمله له مجانًا".

ويختتم الكابتن أنور حديثه: "أكتر حاجة مزعلاني إن المهنة أوشكت على الاندثار ومفيش حد من الجيل الجديد عاوز يتعلمها، وأنا على استعداد أعلم أي حد عاوز يتعلمها مجانًا".