300 أسرة متضررة .. فلاحو قرية الشراقوة بالبحيرة: مصدر رزقنا هيروح والحل حق الشفعة (فيديو وصور)

البحيرة - أحمد نصرة:

بين عشية وضحاها وجد أفراد أكثر من 300 أسرة بقرية الشراقوة في مركز دمنهور بمحافظة البحيرة أنفسهم مهددون بفقد مصدر رزقهم الوحيد، بعد بيعت الأرض التي يستأجرونها أبًا عن جد دون الرجوع إليهم.

ويرى أهالي القرية في بيع الأرض إجحافًا لحقهم في الشفعة بعد أن عرضوا دفع نفس المبلغ الذي بيعت به الأرض إلا أن كل محاولاتهم باءت مع المالك بالفشل.

يقول علي حمدي أحد أهالي القرية: " إحنا طلعنا لقينا أهالينا بتفلح في الأرض دي ومعندناش مصدر رزق غيرها، بأي حق عاوزين يطلعونا منها".

ويوضح حمدي: " الأرض مساحتها 53 فدان متوزعة على أسر القرية، وعايش من وراها حوالي 3 آلاف فرد".

ويضيف حمدي: " إحنا مش عاوزين غير حقوقنا الفلوس إللي اتدفعت إحنا هندفع زيها بالظبط، والقانون بيدينا حق الشفعة، إنما إللي حصل إن المالك باع الأرض من ورانا ومن غير ما يرجعلنا".

ويوكد طارق من أهالي القرية: " الفلوس جاهزة وربنا يعلم جمعناها إزاي، إللي عنده بيت باعه وإللي عنده بهيمة باعها وإللي عنده دهب باعه، المهم إننا جمعنا المبلغ بالكامل ومستعدين لدفعه للمالك في أي وقت".

ويشير طارق إلى اتخاذ عدد من الإجراءات القانونية: " أول حاجة عملنا محضر إثبات حالة في مركز الشرطة، وكلفنا محامي برفع قضية لإثبات حقوقنا والمطالبة بحق الشفعة، ولكن نتمنى أن يستجيب الطرف الآخر لصوت الحق و العقل، وياخد فلوسه إللي دفعها ويادار ما دخلك شر".