عايزه أدفنه في مصر.. والدة الصيدلي المقتول بالسعودية تكشف تفاصيل مقتل ابنها

البحيرة - أحمد نصرة:

كشفت والدة الصيدلي المصري المقتول بالسعودية، تفاصيل مقتل أبنها أثناء عمله بإحدى الصيدليات هناك.

وأوضحت الأم: "بحسب زمايله إللي في السعودية أنه أثناء وجوده بالصيدلية، جاء شخصين بسيارة، ودخل عليه واحد منهم ملثماً، وقال له عايزينك تيجي معانا تكشف على واحد بره، فرفض وقاله مقدرش أسيب الصيدلية، فضربه بالنار".

وأضافت: "ابني اتصل بيا قبل الحادث بيوم واحد وكان بيطمئن عليا ويشوفني لو عاوزة حاجة، لأنه إبني الكبير وشايل مسؤوليتنا بعد وفاة والده، مين هيعوضنا ويعوض إبنه إللي سايبه وعمره 8 سنين؟".

وأكملت: "أولادي عرفوا الخبر ومكانوش عارفين يبلغوني إزاي عشان خايفين عليا لكن قلبي كان حاسس لما لقيتهم منهارين أنا مش عاوزة غير القصاص لإبني، وسرعة دفنه سواء في مصر أو في البقيع".