"الأهالي ولعوا فيها 3 مرات".. الغرفة المهجورة تثير الرعب في البحيرة- صور

البحيرة - أحمد نصرة:

أثارت غرفة مهجورة، على أحد الطرق الفرعية، بمنطقة إفلاقة، في مركز دمنهور بمحافظة البحيرة، حالة من الذعر بين الأهالي، لاستغلالها من قبل المنحرفين والخارجين عن القانون، وكرًا للمخدرات والأعمال المنافية للآداب.

يقول محمود فايد: "الغرفة دي تبع مدرسة الزراعة على أول الطريق الرابط بين قريتي الحبروك وعلي باشا من على الكورنيش ومهجورة بقالها سنين، الشباب ليل نهار قاعدين فيها يضربوا حقن، وده طريق بيمشي عليه أطفال وستات".

ويطالب فايد بالاستجابة لمطالب الأهالي بهدم الغرفة : "كل ما نتكلم مع مدرسين المدرسة يقولوا مالناش فيه ومش بإيدينا، ياريت الغرفة دي تتهد منعاً إنها تكون مأوى للشباب الفاسد ولعدم ترويع المارة من هذا الطريق".

ويقول أحمد الغرباوي: "إحنا مخلصين المدرسة دى من 8 سنين وعلى وضعها من وقتها، وكان بيبقى فيها خارجين عن القانون بيثبتوا المارة، ورغم إن الأهالي ولعوا فيها 3 مرات قبل كده بس محدش اتحرك".

وتقترح فاتن السعيد: "لو مش عاوزين يهدوها على الأقل تتقفل ويتعملها أبواب حديد عشان محدش يعرف يدخلها غير المسؤولين عنها، إنما وضعها كده مينفعش".